Táýelsizdik kúniniń róli alasarmaıdy, 16 jeltoqsannyń máni tereń, qadiri erekshe - Senat tóraǵasy
«Respýblıka kúnin ulttyq merekege aınaldyrý – tarıhı ádilettiliktiń saltanaty dep sanaımyz. Sol arqyly biz tarıhymyzǵa obektıvti kózqaras qalyptastyramyz. Aldyńǵy býynnyń erkindikke degen umtylysynyń laıyqty baǵasyn bere alamyz. Sol sebepti, biz bul kúnniń mánin jalpyǵa túsindirýge mindettimiz. Árıne, bul sheshimderdi Táýelsizdik kúniniń rólin alasartý dep qabyldamaý kerek. Biz úshin 16 jeltoqsannyń máni tereń, qadiri erekshe. Jalpy, jeltoqsan aıynyń tarıhymyzdaǵy orny bólek. Bul – halqymyz úshin qasıetti ári qasterli aı. Alash úkimeti erkindikke umtylyp, osy aıda avtonomııa jarııalady», - dedi M. Áshimbaev «Egemendik jáne Qazaqstannyń saıası-quqyqtyq transformatsııasy» taqyrybyna arnalǵan Senattaǵy «Ulttyq múdde» dıalog alańy otyrysynda.
Osy oraıda, Senat tóraǵasy eki merekeniń mán-mańyzyn qatar túsindirip, ulyqtaý kerek ekenin atap ótti.
«1986 jylǵy Jeltoqsan kóterilisin de el jadynan óshirý múmkin emes. Egemendik úshin egesken jastardyń erik-jigeri Keńes Odaǵynyń irgesine syzat túsirip, ydyraýyna sebep bolǵany belgili. Sondyqtan, Táýelsizdik kúninde biz kóbine tarıhqa úńilip, odan taǵlym alýǵa mán beremiz. Munyń bári Táýelsizdik kúni dańǵaza toıdyń emes, tarıhqa taǵzym kúni ekenin aıqyn kórsetip tur», - dedi Máýlen Áshimbaev.
Budan buryn habarlanǵandaı, Senat tóraǵasy 25 qazan elimiz úshin azattyqqa umtylys jolynda taǵdyrsheshti nátıjege qol jetkizgen kún retinde qadirli ekenin atap ótti.
