Táýelsizdik kúnine oraı ShQO-daǵy sottalǵandar dombyra men astaý jasady
ÓSKEMEN. QazAqparat – Shyǵys Qazaqstan oblysyndaǵy sottalǵandar el Táýelsizdiginiń 30 jyldyq mereıtoıyna arnap dombyra men astaý jasady, dep habarlaıdy QazAqparat tilshisi.
ShQO boıynsha Qylmystyq atqarý júıesi departamenti (QAJD) baspasóz qyzmetiniń málimetine súıensek, OV 156/6 jáne OV 156/20 túzetý mekemelerinde jazasyn ótep jatqan táýelsizdik qurdastary dombyra men astaý jasap shyǵardy. Onda «Táýelsizdikke 30 jyl» dep jazylǵan.
«OV 156/20 kolonııasynda sottalǵan azamat astaýdy jergilikti murajaıǵa syıǵa tartty. Al OV 156/6 mekemesinde 10 jylǵa bas bostandyǵynan aıyrylǵan er adam óz qolymen jasaǵan qazaqtyń ulttyq aspabyn sol mekemede sabaq bergen ustazy Aqtaý Beksoltanovqa syıǵa tartty. Sottalǵan túrmege túsken kezde mektepti aıaqtamaǵan bolatyn. Sondyqtan ol mekemeniń keshki mektebine 8 synyptan bastap oqýǵa qabyldanyp, bilim aldy», - dedi departamenttiń baspasóz hatshysy Saltanat Ojıkanova.
ShQO kolonııalarynda jazasyn ótep jatqan sottalǵandarda el Táýelsizdiginiń 30 jyldyq mereıtoıyna oraı túrli is-sharalar ótkizilýde. Bas bostandyǵynan aıyrylǵandar merekege arnap qabyrǵa gazetterin jasap, sporttyq saıystarǵa qatysýda.
