Táýelsizdik kúnine oraı oqýshylar arasynda dóńgelek ústel ótti
ALMATY. Qarashanyń 24-i. QazAqparat /Ádilet Musahaev / - Búgin Almatydaǵy №132 gımnazııada «Táýelsizdikke jol. Biz bári qalaı bastalǵanyn este saqtaımyz» taqyrybynda jıyn ótti. Oǵan QR Parlamenti Májilisiniń depýtattary, jeltoqsan oqıǵasyna qatysýshylar, óner qaıratkerleri qatysty,
dep habarlaıdy QazAqparat.
Gımnazııa dırektory Bıbi Dýanabaevanyń aıtýynsha, osy shara arqyly oqýshylarǵa Qazaqstan táýelsizdigin alý jolynda atqarylǵan isterden keńirek maǵlumat berip, olardy ultjandylyqqa tárbıeleý. «Sharanyń negizgi maqsaty - jastarǵa óz Otanyn maqtanysh etý jáne halqynyń tarıhy men mádenıetine degen qyzyǵýshylyǵyn arttyrý», deıdi dırektor.
Jıyn barysynda depýtattar men jeltoqsan oqıǵasyna qatysýshylar Qazaqstannyń táýelsiz memleket bolyp qalyptasý joly men bolashaǵy jaıynda áńgime qozǵady. QR Parlamenti Májilisiniń depýtaty Kamal Burhanov ata-babalarymyzdyń osydan júzdegen jyl buryn memleket qurǵandyǵyn, olardyń ishki, syrtqy saıasaty bolǵandyǵyn jáne árqashanda táýelsizdik, memlekettik uǵymy sanadan uzap ketpegendigin jetkizdi. Sondaı-aq halqymyzdyń memlekettilik sana sezimin joıý úshin, totalıtarlyq úkimettiń istegen qııanattary jaıynda aıtyp ótti. «Búgingi jıynǵa keletin bolsam, jastardyń sóılegen sózderi, aıtqan oılary, keltirgen derekterine rıza boldym. Qazirgi qoǵam damýynda ózindik oı-pikirleri bar, belsendi bólshek retinde ózderin kórsetip otyr», deıdi depýtat.
«Mektep qabyrǵasyndaǵy jastardyń Táýelsizdik qalaı kelgendigi jaıly bilgileri keletindigi qýantarlyq jaǵdaı. Osyndaı sharalardy tek jeltoqsan aıy jaqyndaǵanda ǵana ótkizbeı, basqa ýaqyttarda da jıi ótkizip tursa jaqsy bolar edi», deıdi M. Áýezov atyndaǵy akademııalyq teatrdyń akteri, jeltoqsan oqıǵasynyń qatysýshysy Úsiphan Seıtimbet.
