Táýelsizdik kúnine oraı astanalyq qustar «baspanaly boldy»

ASTANA. QazAqparat - Qustarǵa arnalǵan «72 páterli úı» Otbasy saıabaǵynda paıda boldy, dep habarlaıdy elorda ákimdiginiń medıa ortalyǵy.

Qustar úıi - 6 qabat, onda 72 «páter» bar. 150-ge tarta «turǵyn» meken ete alady.

Úıshikti ornatqan - astanalyq Sanjar Boqaev. Ol sýyqqa tońǵan kishkentaı balapandardy kórip, úıshikke tapsyrys bergen. Uıa bes kúnde daıyn bolypty. Ár bólikke eki qus sııady. Endi, kem degende, 150 torǵaıdyń baspanasy bar. Qustar óz baspanasyn kórgen soń, bir mezette-aq jıylǵan.

«Kóppáterli» úıshikti ornatyp jatqan kezde, aınaladaǵy kógershinder men torǵaılar ushyp keldi. Jańa baspana olardyń kóńilderinen shyqqan sııaqty. Dostarym, qustar, memlekettik baǵdarlama boıynsha baspanaly boldy», - dep kúledi S. Boqaev.

Jańadan qonys tapqandardy saıabaqta demalýshylar qorektendiredi.

«Buryn almatylyqtar Astananyń «jany joq» dep jıi aıtatyn. Olardyń ishinde men de barmyn. Al qazir olaı emes. Elordanyń óz qýaty, aýrasy, ómiriniń dınamıkasy bar. Shynyna kelgende, qala degen, birinshi kezekte, adamdar. Qalanyń beınesi, jany, ómir súrý deńgeıi qandaı bolatyny bizdiń árqaısymyzǵa baılanysty. Bireý sizdiń aınalańyzdaǵy álemdi jaqsarta túsedi dep kútpeńizder. Sol álemdi ózińiz jaryqtandyryńyz», - dep túıindedi Sanjar Boqaev.