Táýelsizdik kúnine oraı Astanada «JÝSAN» baletiniń premerasy ótedi
ASTANA. QazAqparat - «Astana balet» teatrynyń jańa maýsymy úlken úmit pen tartymdy premeralardyń maýsymy bolmaq. Teatr óziniń ekinshi maýsymyn Táýelsizdik kúnine oraılastyrylǵan ulttyq joba - bir aktili «Jýsan» baletimen ashady, dep habarlady astana.kz.
Kórermender qoıylymdy 10 jáne 11 jeltoqsanda «Astana Opera» sahnasynda tamashalaı alady. Oǵan ujymnyń barlyq trýppasy qatysady. «Osy maýsymdaǵy teatrdyń alǵashqy premerasy Qazaqstannyń balet óneri tarıhyndaǵy iri oqıǵa bolmaq. Teatrdyń repertýarynda tuńǵysh ret ulttyq tarıhymyzǵa arnalǵan bir aktili balet qoıyldy. Osyǵan deıin qazaq sahnasynda túrik tarıhyna arnalǵan («Álem» baleti) qoıylǵan bolatyn, al halyqtyń tarıhy, dala tarıhy balet sahnasynda tuńǵysh ret somdalmaq», delingen habarlamada. Baqyt Qaıyrbekovtyń jyr joldary spektakl lıbrettosynyń negizin qurady. «Jýsan» - avtorlyq balet. Bul - jas horeograf Mýkaram Avahrıdiń jasaǵan tuńǵysh úlken eńbegi. Baletti qoıý jumysyna Qazaqstan Respýblıkasynyń eńbek sińirgen qaıratkeri, professor Alıla Álisheva, Qazaqstannyń eńbek sińrgen ártisi Aıgúl Tatı, Ýdmýrt Respýblıkasynyń eńbek sińirgen qaıratkeri Nıkolaı Markelov, pedagog-repetıtor Zaýre Úmbetqulova at salysty.
