Táýelsizdik kúnine arnalǵan otshashý Astananyń úsh aýdanynda bolady

ASTANA. QazAqparat - Astanada QR Táýelsizdigi kúnine arnalǵan is-sharalar 11-17 jeltoqsan aralyǵynda ótedi. Merekelik otshashýdy Astananyń úsh aýdanynda tamashalaýǵa bolady, dep habarlaıdy QazAqparat elorda ákimdiginiń medıa ortalyǵyna silteme jasap.

Astana qalasynyń mádenıet, muraǵattar jáne qujattama basqarmasynan málim etkendeı,  14 jáne 17 jeltoqsan kúnderi «Astana» kontsert zalynda Sımfonııalyq orkestri men «Saryarqa» halyq aspaptary ansambliniń kontsertteri ótedi. Al 16 jeltoqsan kúni saǵat 19:30-da «Án men ánshi» («Astana» kontsert zaly) merekelik kontserti kórermenderge kóterińki kóńil-kúı syılaıtyn bolady.

Astana teatrlarynyń da óz kórermenderine ázirlegen tartýy bar. Máselen, «Jastar» teatrynda 14 jeltoqsanda qyrǵyz jazýshysy Janysh Qulmambetovtyń dramasynyń jelisi boıynsha «Jasaýyl» qoıylymynyń tusaýkeseri ótedi. Q.Qýanyshbaev atyndaǵy Memlekettik akademııalyq qazaq mýzykalyq drama teatrynda 16 jeltoqsan kúni «Abylaıhannyń armany» atty tarıhı drama kórermenniń nazaryna usynylady, osy kúni M.Gorkıı atyndaǵy Memlekettik akademııalyq orys drama teatrynda eki spektakl kórsetiledi - «Bratets Lıs ı bratets Krolık» ertegisi men eresekterge arnalǵan «Master ı Margarıta» ekletıkasy. Munymen qosa, mereke kúnderi balalar Qýyrshaq teatrynda «Atameken» ertegisin tamashalaıdy. 

Budan bólek, ashyq alańdarda qazaqstandyq estrada juldyzdarynyń qatysýymen úlken kontsertter ótedi. 16 jeltoqsanda Álisher Kárimov, Álı Oqapov, aǵaıyndy Júginisovter, Marjan Arapbaeva, Asqar Júnisbek, «ArtDombyra» trıosy óner kórsetedi. Merekelik sharalar Qalalyq alańda jáne «Báıterek» monýmentiniń janyndaǵy alańda ótedi. Bastalýy - saǵat 18:00-de.

Sonymen qatar, elorda turǵyndary men qonaqtarynyń nazaryna merekelik otshashý usynylady. Otshashý 16 jeltoqsan kúni saǵat 22:00-de Esil ózeniniń jaǵalaýynda, «Han Shatyr» SOSO janynda jáne Abylaıhan dańǵyly men Pýshkın kósheleriniń qıylysyndaǵy gúlbaqta uıymdatyrylady.