Táýelsizdik kúnine arnalǵan merekelik otshashý elordanyń úsh núktesinde iske qosylady
Merekelik otshashý búgin, 15 jeltoqsanda saǵat 21:00-de qalanyń úsh núktesinen bastalady:
- Botanıkalyq baqtyń aýmaǵy;
- Atyraý kópiriniń soltústigindegi Esil ózeniniń sol jaǵalaýy;
- Aqbulaq ózeniniń soltústik jaǵy, Pýshkın kóshesi men Abylaı han dańǵylynyń qıylysy.
Aıta ketý kerek, Táýelsizdik kúnin merekeleý áleýmettik nysandardyń ashylýymen qatar júredi: 20 myńnan astam oqýshy ornyna eseptelgen jeti mektep, 2,5 myń áleýmettik páterge 6 kóppáterli turǵyn úı kesheni (Qoljetimdi turǵyn úı), úleskerlerdiń 2 myń 400 otbasyna 9 úlestik qurylys nysany jáne t. b.
Sonymen qatar, mereıtoılyq dataǵa oraı qalanyń mádenıet mekemeleri kórmelerden bastap tarıh sabaqtaryna deıin birqatar is – sharalar daıyndaýda.
16 jeltoqsanda Táýelsizdik kúnine oraı «Nomad City Hall» sahnasynda «Jas Abaı» spektakli kórsetiledi.
16 jáne 17 jeltoqsanda Astanalyq tsırktiń bas manejinde «Astanalyq tsırk ot jaǵady» qaıyrymdylyq tsırk baǵdarlamasy ótedi.
17 jeltoqsanda «Jastar» saraıy «Meniń Otanym – Qazaqstan» kontserttik baǵdarlamasyna shaqyrady.
Elorda kitaphanalary el Táýelsizdiginiń 30 jyldyǵyn merekeleýge oraı qala turǵyndary úshin is-sharalar daıyndady.
15 jeltoqsan kúni № 3 buqaralyq kitaphanada «Táýelsizdiktiń bastaýy - jeltoqsan» atty tarıh sabaǵy, №5 buqaralyq kitaphanada «Táýelsizdik týy astynda 30 jyl» atty aqparat saǵaty, №15 buqaralyq kitaphanada «Táýelsizdik – eldiń tiregi» atty tarıh saǵaty ótkiziledi. 16 jeltoqsanda Ortalyq balalar men jasóspirimder kitaphanasy « Táýelsiz elim – Qazaqstanym» kitap kórmesine, №2 Balalar kitaphanasy «Egemen elmiz, erkinbiz! erteńgiligine, al № 3 buqaralyq kitaphana – «Jeltoqsan kóterilisi-táýelsizdikke umtylǵan jastardyń kúresi« atty tarıh sabaǵyna shaqyrady.
Barlyq is-sharalar sanıtarlyq normalardy saqtaı otyryp júrgiziledi. Elorda turǵyndary men qonaqtary maska rejımi men áleýmettik qashyqtyq týraly umytpaýy kerek.
