Táýelsizdik kúnin kim qalaı qarsy alady

NUR-SULTAN. QazAqparat - Táýelsizdik - eń qasterli, qasıetti uǵym. Bul sózdi aıtqan kezde arǵysy - egemendik úshin qasyq qany qalǵansha aıqasqan batyr babalarymyz, bergisi - Jeltoqsan oqıǵasy qurbandary kóz aldyńa elesteıdi. «QazAqparat» halyqaralyq aqparat agenttiginiń tilshisi ártúrli saladaǵy qoǵam belsendilerinen bul kúndi qalaı atap ótetinin surady.

Qýanysh Sultanov, Parlament Májilisiniń depýtaty:

- Táýelsizdik kúni – bizdiń otbasy úshin eń qasıetti, eń úlken mereke. Bul kúni tańerteń oıanǵan nemerelerim maǵan ánuran aıtyp beredi. Osylaısha merekelik kóńil-kúı syılap, ózderi de bul merekeniń mańyzyn túsinedi.

Meniń oıymsha, ár adam osylaı istese Táýelsizdik kúni otbasylyq merekege aınalady.

Berik Ábdiǵalıuly, Ulytaý aýdanynyń ákimi:

- Men bul kúni resmı is-sharalarǵa qatysamyn. Otbasy múshelerin merekemen quttyqtaımyn, biraq úlken dastarhan jaıyp otyramyz dep aıta almaımyn.

Táýelsizdik kúni – memlekettik deńgeıdegi mereke. Ol týǵan kún, mereıtoı, Jańa jyl, Naýryz merekesi sııaqty otbasylyq merekege aınalǵan joq. Memlekettik merekeniń dárejesi bólek. Munda eń bastysy – memlekettik qundylyqtardy ardaqtaý. Árıne,bul kúndi bári atap ótip, ulyqtaý kerek, biraq báribir jaqyn arada otbasylyq mereke bola almaıdy. «Otan – otbasynan bastalady», sondyqtan bul mereke otbasynda da atalyp ótkeni durys. Degenmen, memlekettik qundylyqtarǵa qyzyqpaıtyn otbasylar, ókinishke qaraı, áli kóp.

Rasýl Jumauly, saıasatker:

- Táýelsizdik kúni – qatardaǵy mereke emes. Bul kún jaı ǵana demalys kúni emes, ár qazaq maqtan tutatyn, mańyzyn túsinýge umtylatyn kún. Óz basym bul kúni balalarymmen birge ortalyq alańdaǵy Táýelsizdik monýmentine gúl shoǵyn qoıyp, iltıpatymdy bildiremin. Bul - Táýelsizdik kúni qalaı kelgenin eske alyp, baǵalaıtyn kún. Sol kúni otandyq telearnalardan Táýelsizdik kúniniń qurmetine kórsetiletin derekti fılmderdi tamashalaımyz.

Bul kún - keshendi ıdeologııamen, ulttyq sana-sezimdi qalyptastyrýmen tikeleı baılanystaǵy meıram, sol sebepti mektep tabaldyryǵynan bastap osy kúnniń mańyzyn keń kólemde nasıhattaýymyz kerek.

Qaraqat Ábildına, ánshi:

- Táýelsizdik kúni otbasynda bolsyn, qaı jerde bolsyn - keń kólemde atalyp ótýi kerek. Ózim balalaryma bul kúnniń ońaılyqpen kelmegenin, ata-babamyzdyń tógilgen qany, kóz jasymen kelgen qasterli kún ekenin aıtyp otyram. Bul – árbir ata-ananyń mindeti.

Táýelsizdik kúnine oraı ánshi retinde repertýarymyzdy jańartyp, el-jerdi súıýge qatysty án jazamyz. Ánshi bola tura Táýelsizdik kúnin ulyqtap, Otanyńnyń qasıetin túsinip, ánge qospaý múmkin emes.

Meniń mektebim Jańa jyldy toılamaıdy. Oqýshylardyń patrıottyq sezimin oıatý úshin mereke qarsańynda «Táýelsiz eldiń urpaǵymyz» atty kontsert ótkizip, Táýelsizdik kúnine qatysty án aıtyp, poezııa oqyp, balalar bar ónerin ortaǵa salady. Táýelsizdikti maqtanyshpen jyrlaý kerek ekenin jas urpaqtyń sanasyna sińirsek, osynyń bári balalardyń jadynda jattalyp qalady. Bul – Táýelsizdik merekesin atap ótýge qosqan meniń úlesim.