Táýelsizdik kúni: Túrkistan oblysynda kópbalaly otbasylar baspanamen qamtyldy

NUR-SULTAN. QazAqparat - Túrkistan oblysy, Saıram aýdany ákimdigi tarapynan QR Táýelsizdigi kúnine oraı, muqtaj retinde birinshi kezekte turǵan 10 otbasyǵa baspana kiltteri tabystaldy, dep habarlaıdy QazAqparat.

Túrkistan oblysy ákiminiń baspasóz qyzmeti taratqan derekterge qaraǵanda, qonys toı ıeleri aýdan ákimi Ulasbek Sádibekovtiń qolynan baspana sertıfıkatyn aldy, «Nurly jer» memlekettik baǵdarlamasyn aıasynda Saıram aýdanyndaǵy kópbalaly otbasylardy turǵyn úımen qamtamasyz etý úshin respýblıkalyq bıýdjet esebinen 252 mln teńge qarjy bólingen bolatyn. Bul qarajatqa 30 baspana alý josparlanǵan.

Qazirgi tańda sanıtarııalyq - epıdemıologııalyq jáne tehnıkalyq talaptarǵa sáıkes keletin 26 turǵyn jaı satyp alyndy. Taǵy 4 úı atalǵan talapqa sáıkestigi anyqtalýda.

Josparǵa sáıkes, 30 baspana aýdandaǵy memlekettik turǵyn úı qorynan turǵyn úıge muqtaj retinde tirkelgen kópbalaly otbasylarǵa beriledi.

Aıta keteıik, búgingi tańda aýdan aýmaǵyndaǵy memlekettik turǵyn úı qorynan turǵyn úıge muqtaj retinde 370 kópbalaly otbasy tirkelgen.