Táýelsizdik kúni qarsańynda Elbasy týraly kitaptyń tusaýy kesildi
Qala ákimdiginiń baspasóz qyzmetiniń habarlaýynsha, kitapqa Elbasynyń Qazaqstan táýelsizdigin tuǵyrly etý, qoǵamdaǵy turaqtylyqty saqtaý, Qazaqstandaǵy jáne álemdegi qaýipsizdikti qamtamasyz etý turǵysyndaǵy batyl bastamalary men Astanany salý syndy biregeı ıdeıalary arqaý bolǵan.
Týyndy avtory Qaırat Bısembaev Elbasynyń atom qarýynan bas tartý, álemdik dinbasylardyń basyn qosý, Qazaqstan halqy Assambleıasyn qurý jáne astanany kóshirý sekildi taǵdyrly sheshimderine tereń úńile otyryp, onyń qaıratkerlik, kóshbasshylyq qasıetterin túrli qyrynan asha túsedi.
«Biz Táýelsizdiktiń alǵashqy jyldaryndaǵy qıynshylyqty da, sol bir kezeńnen jas memlekettik Prezıdentimizdiń qandaı qajyr-qaıratpen alyp shyqqanyn da, elimizdiń jańa ǵasyrda jańa belesterge qalaı qanat qaqqanyn da kórdik. Búginde sonyń bárin oı eleginen ótkize otyryp, Nursultan Nazarbaevtyń eńbegine ishteı qaıran qalamyn. Sol sezim qolyma qalam alyp, meni osy kitapty jazýǵa jeteledi», - deıdi kitap avtory.
Bul rette avtor Qazaqstan Prezıdenti jaıyndaǵy óz oıyn álemniń asa kórnekti saıası kóshbasshylarynyń pikirlerimen kómkerip, qyzyqty etip jetkizedi. Tórt taraýdan turatyn kitaptyń tili qarapaıym, mazmuny tarıhı derekter men estelikterge baı.
