Táýelsizdik kúni qarsańynda Atyraýda 280 oryndyq balabaqsha ashyldy
Jańa balabaqsha Atyraý qalasynyń irgesindegi Rakýsha eldi mekeninde salynǵan. Onyń qurylysy «Teńizshevroıl» JShS-niń «Igilik» baǵdarlamasymen salynǵan.
«Biz el Táýelsizdiginiń 30 jyldyǵy qarsańynda taǵy bir mektepke deıingi tálim-tárbıe berý oshaǵyn iske qosqaly turmyz. Bul – osy aýylda turatyn otbasylar úshin úlken qýanysh. Qazir Atyraý qalasynda 96 balabaqsha jumys isteıdi. Onyń ishinde 46 memlekettik balabaqshada 12 030 bala tárbıelenip otyr. Sondaı-aq, qaladaǵy 50 jeke menshik balabaqshaǵa 4 455 bala barady. Osyndaı 34 balabaqshaǵa memlekettik tapsyrys beriledi», -dedi Atyraý qalasynyń ákimi Qaırat Orazbaev.
Kompanııanyń úkimetpen jáne jurtshylyqpen baılanys bóliminiń bas menedjeri Rzabek Artyǵalıevtyń málimetinshe, jańa balabaqsha 280 balaǵa eseptelgen. Jalpy aýdany 2785 sharshy metrdi quraıdy. Balabaqsha aýmaǵynda 14 toptyq alań, jalpy dene shynyqtyrý jáne jol qozǵalysy erejelerin zertteýge arnalǵan alań jabdyqtalǵan. Ǵımaratta gımnastıkaǵa, mýzyka sabaǵyna arnalǵan ámbebap zal, dene tárbıesine arnalǵan zal, sondaı-aq, ámbebap úıirme úı-jaıy bar.
«Bizdiń kompanııa bilim berýdiń sapasy men qoljetimdiligin damytýǵa erekshe kóńil bóledi. Sol sebepten, ár bala men jasóspirimniń jeke qabiletin damytý úshin ıkemdi daǵdylarǵa oqytýdy, kásiptik baǵdarlaý jobalaryn qoldaıdy. Al, bıyl kórý qabiletinen aıyrylǵan jáne nashar kóretin balalarǵa Braıl qarpin qazaq, aǵylshyn jáne orys tilderinde biregeı trenajerdiń kómegimen úıretýge kómektesetin «Sezual» jobasyna qoldaý bildirdi. Taǵy bir mysal – akademık Qabdolov qoryn qoldaý. Bul qor Qazaqstannyń barlyq aımaǵynda áleýmettik jelilerdiń kómegimen qazaq tilin úırenýdi yntalandyryp otyr», -deıdi Rzabek Artyǵalıev.
Eske sala ketelik, buǵan deıin Atyraýda Táýelsizdik kúni qarsańynda 200 oryndyq jataqhana ashylǵanyn habarlaǵan bolatynbyz.
