Táýelsizdik kúni qarsańynda Almatyda jańa dıagnostıkalyq ortalyq ashyldy
ALMATY. QazAqparat - Almatyda zamanaýı qurylǵylarmen jabdyqtalǵan jańa dıagnostıkalyq ortalyq ashyldy, dep habarlaıdy QazAqparat tilshisi.
Saltanatty sharaǵa qatysqan Almaty ákimi Baqytjan Saǵyntaev
medıtsına qyzmetkerlerin aldaǵy Táýelsizdik kúnimen quttyqtap, zamanaýı KT-ortalyqtaryn ashý jedel aralasýdy talap etetin shuǵyl aýrýlar kezinde patologııalardy dıagnostıkalaý jáne erte anyqtaý boıynsha halyqqa qadamdyq qoljetimdilikti qamtamasyz etetinin atap ótti.
Ortalyqta málimdegendeı, 64 tilimdegi kompıýterlik tomograf joǵary jyldamdyqpen skanerleýdi oryndaıdy. Apparattyń jumys isteýi KT-zertteýlerin basqa emdeý uıymdaryna jiberý qajettiligin aıtarlyqtaı tómendetedi.
«Jańa tomograf pandemııa kezinde zertteý kezekterin edáýir jeńildetedi. Apparattyń qýattylyǵy kúnine 40-qa jýyq adamnyń tekserýden ótýin qamtamasyz etýge múmkindik beredi. Bul bizdiń turǵyndarǵa medıtsınalyq kómek kórsetý sapasyn jaqsartady», - dedi Naýryzbaı aýdanynyń medıtsınalyq uıymdarynyń basshysy Gúljanat Tilegen.
№36 emhana janyndaǵy KT ortalyǵy tek Naýryzbaı aýdanynyń ǵana emes, sondaı-aq, Áýezov, Alataý aýdandarynyń, Almaty oblysynyń Qarasaı aýdanynyń turǵyndaryna da qyzmet kórsetetin bolady.
Almaty ákimdiginiń málimetinshe, búginde Almaty qalasynyń densaýlyq saqtaý nysandaryn jabdyqtaý kórsetkishi 91,5%-ǵa jetti. Anestezıologııa, reanımatsııa jáne qarqyndy terapııa bólimsheleriniń jabdyqtalýy 100%-ǵa deıin jetkizildi. Jedel medıtsınalyq járdem jumysy jaqsardy. 3 jańa qosalqy stantsııa salyndy. Brıgadalar sany eki esege artty. Avtopark 70% jańartyldy.
Tuńǵysh Prezıdent – Elbasy N. Nazarbaevtyń tapsyrmasy boıynsha aǵymdaǵy jáne yqtımal epıdemıologııalyq qaterlerge den qoıý boıynsha eldiń ǵylymı-medıtsınalyq áleýetin shoǵyrlandyrý maqsatynda Almatyda ınfektsııalyq aýrýlardyń kópbeıindi ǵylymı-zertteý ortalyǵynyń qurylysy bastaldy.
Aǵymdaǵy jyly úsh emhananyń, 9 otbasylyq-dárigerlik ambýlatorııanyń qurylysy bastaldy. Balalarǵa shuǵyl kómek kórsetý ortalyǵynyń jáne №2 QBKA qosymsha korpýstarynyń qurylysy, pallıatıvtik kómek ortalyǵy bar jańa onkologııalyq ortalyqtyń jáne Medeý aýdanynda kópbeıindi statsıonar salynýda.
250 tósektik Balalardy ońaltý ortalyǵyn jáne 50 tósektik erte aralasý ortalyǵyn ornalastyrý úshin burynǵy Almaty temir jol aýrýhanasyn qaıta jańartý jáne kúrdeli jóndeý josparlanýda.
