Táýelsizdik kúni: Atyraýda memlekettik marapattar tapsyryldy

ATYRAÝ. QazAqparat - Qurmanǵazy atyndaǵy mádenıet saraıynda Táýelsizdik kúnine oraı saltanatty shara ótti. Memlekettik marapattar men qurmet gramotalary,  alǵys hattar 60-tan astam memlekettik qyzmetshilerge, muǵalimder men dárigerlerge, qoǵamdyq uıymdardyń,  mádenıet,  sport salalarynyń  ókilderine tapsyryldy,  dep habarlaıdy QazAqparat tilshisi.

Saltanatty sharada sóılegen Atyraý oblysynyń ákimi Nurlan Noǵaev memlekettik merekeniń aıryqsha mańyzy bar ekenin atap ótti. 

"Ár eldiń,  ár halyqtyń jyl saıyn toılanatyn basty merekesi  bolady.  Qazaqstanda ol  - Táýelsizdik kúni. 27 jyl buryn bizdiń elimiz táýelsizdikke qol jetkizip,  álemdik qoǵamdastyq tarapynan qoldaýǵa ıe boldy.  Bul ata-babamyzdyń san ǵasyr boıǵy armany men úmitiniń aqıqatqa aınalýy.Osy jyldar aralyǵynda Elbasynyń sarabdal saıasatynyń arqasynda elimiz tabystarǵa qol jetkizdi. Búgingi Qazaqstan dúnıe júzindegi  iri memlekettermen qatar qaýipsizdik pen álemdik ekonomıkanyń  damýyna ólsheýsiz úles qosyp keledi",- dedi Nurlan Noǵaev.

Aımaq basshysy qazaqstandyqtardyń birligi men ózara túsinistigi elimizdiń ekonomıkalyq,  áleýmettik damýyna oń yqpal etip  otyrǵanyn atap ótti. Bizdiń bárimizdi biriktiretin bir dúnıe - maqsat qoıa bilý,  aıanbaı eńbek etý jáne óz halqyńa,  Otanyńa qurmetpen qaraý,  sol arqyly qaı salada da jetistikterge jetip kelemiz.  Osyndaı adamdardyń arqasynda óńirimiz de,  elimiz de damyp keledi. 

"Dúnıe júzinde qanshama adamdar óz memleketteriniń táýelsiz bolýyn armandaıdy.  Qazaqstannyń táýelsizdigi - halyqtyń basty baılyǵy. Qazaqstan halqynyń 1991 jyly jasaǵan tańdaýynyń sarqylmas tarıhı kúshiniń túıini  - azat,  táýelsiz elde beıbitshilik pen kelisimde ómir súrý,  jarqyn bolashaǵyn qurý", - dedi oblys ákimi.

Álemniń saıası kartasyna engeli Qazaqstannyń ustanymy men bedeli bekidi,  halyqtyń ál-aýqatynyń kóterilýiniń negizi boldy,  munyń bári memleketimizdiń táýelsizdiginiń arqasynda bolǵan ıgilikter.  Prezıdent Nursultan Nazarbaevtyń bolashaqty boljaı bilýi saıası arenadaǵy memleket táýelsizdiginiń mańyzdylyǵyn anyq kórsetti. 

"Eldiń birtutastyǵy,  qarqyndy damýy ár qazaqstandyqtyń jaǵdaıynyń jaqsarýyna oń áser etedi. Muny bizdiń óńirimizde jasalyp jatqan jumystar arqyly da baǵamdaýǵa bolady.  Qazir aımaqta áleýmettik-ekonomıkalyq damýǵa qajet alǵysharttardyń bári bar.  Jańa áleýmettik nysandar salynyp,  ekonomıkanyń barlyq salalary damýda, turǵyndardyń turmys deńgeıi artýda,  bul bizdiń basty tabysymyz",  - dedi oblys ákimi.

Quttyqtaý sózinen soń Nurlan Noǵaev birqatar atyraýlyqtarǵa «Parasat», «Qurmet», III dárejeli «Eńbek Dańqy» ordenderin,   «Eren eńbegi úshin», «Shapaǵat» medaldaryn jáne alǵys hattar men maqtaý qaǵazdaryn tapsyrdy.

Táýelsizdik kúnine arnalǵan  saltanatty shara  merekelik kontsertpen aıaqtaldy.