Táýelsizdik kúni: Atyraý qalasynda 1200 oryndyq jańa mektep ashyldy
Jańa mektep Atyraý qalasynyń «Bereke» shaǵyn aýdanynda boı kótergen. Mekteptiń ashylý saltanatynda oblys ákimi Mahambet Dosmuhambetov oqýshylar men ata-analardy el Táýelsizdiginiń 30 jyldyq mereıtoıymen quttyqtady.
«Táýelsizdik jyldary bilim berý salasyna aıryqsha kóńil bólindi. Bilim berý mekemeleriniń materıaldyq-tehnıkalyq bazasy jyldan-jylǵa jańartylyp keledi. Osy kezeń ishinde oblysta 95 mektep pen 7 tehnıkalyq-kásiptik bilim beretin oqý oryndary salynyp, paıdalanýǵa berildi. Endi aldaǵy jyly 8 mekteptiń qurylysy aıaqtalady dep josparlanyp otyr. Bul baǵyttaǵy is-sharalar jalǵasyn tabady. Óıtkeni, jas býynnyń alańsyz, sapaly bilim alýyna qolaıly jaǵdaı jasaý – basty maqsatamyz», -dedi Mahambet Dosmuhambetov.
«Bereke» – sońǵy jyldary boı kótergen jańa shaǵyn aýdan. Munda kópqabatty úıler salynyp, turǵyndar sany artty. Osy kezge deıin shaǵyn aýdanda turatyn otbasylardyń 824 balasy bilim oshaǵynyń bolmaýynan qaladaǵy basqa mektepterde bilim alyp kelgen. Endi jańadan ashylǵan 1200 oryndyq mektep zamanaýı qural-jabdyqtarmen qamtylǵan. Mektepte 360 oryndyq májilis zaly, ashana, jazǵy sport alańy men sport zal bar. Al, sport zal boks, ústel tennısi, basketbol, voleıbol, kishi aıaqdop sport túrlerine negizdelip salynǵan. Oǵan qosa mektepte arnaıy qaýipsizdik úshin beınebaqylaý bólmesi qarastyrylǵan.
Eske sala ketelik, buǵan deıin Táýelsizdik kúni qarsańynda Atyraýda 280 oryndyq balabaqsha ashylǵanyn jazǵan edik.