«Táýelsizdik dáýiri» kitaby bizdiń kópten kútken dúnıemiz - Myrzataı Joldasbekov
ASTANA. QazAqparat - Búgin «Egemen Qazaqstan» gazetinde Qazaqstan Prezıdenti Nursultan Nazarbaevtyń «Táýelsizdik dáýiri» kitabyna baılanysty atqarylǵan aqparattyq jumystardy qorytyndylaýǵa arnalǵan dóńgelek ústel ótti, dep habarlaıdy QazAqparat.
«Elbasynyń «Táýelsizdik dáýiri» kitaby shyqqannan beri jer-jerde talqylanyp jatyr. Sonyń ishinde «Egemen Qazaqstanda» búginge deıin 50-den astam maqala jarııalandy. Kitapqa baılanysty telearnalarda da talqylaý júrýde. Keshe Parlamentte, Assambleıada talqylaý boldy. Shyn máninde Táýelsizdik entsıklopedııasy ispetti, jasampaz jyldar jylnamasy ispetti bul kitapty búgin el aǵalarymen talqylaıyq dep jınalyp otyrmyz», - dedi dóńgelek ústel otyrysyn ashqan «Egemen Qazaqstan» gazetiniń basshysy Darhan Qydyráli.
Osydan keıin ol Táýelsizdiktiń eleń-alańynda Elbasymen birge memleketimizdi qurýǵa atsalysqan, kitapta aıtylǵan jaıttarǵa kýá bolǵan memleket jáne qoǵam qaıratkeri Myrzataı Joldasbekovke sóz berdi.
«Bizdiń tarıhshylarymyz áli kúnge deıin qazaq tarıhyn tutas jaza almaı júr. «Ata tarıhynyń baıany» dep kitap jazsańdarshy, dep únemi aıtyp ta kelemin. Jas urpaq ata tarıhyn bilýi kerek. Óıtkeni, qazir eshbir memlekettiń, eldiń tarıhshylary muny teris deı almaıdy. Máselen, bizdiń Uly dalamyzǵa ózge jerden bireý kelip memleket ornatypty, qolǵabys tıgizipti degendi tarıh bilmeıdi, ondaı iz de joq. Al Uly daladan ózge elge baryp memleket qurǵan, olardyń kósegesin kógertken, kerek bolsa solardyń ishine sińip memleket qurǵan tulǵalar tarıhta óte kóp. Elbasymyz da: «Qazaqtyń tarıhy eshkimnen uıalmaıtyn tarıh. Jáne ol tarıh tutastaný, birigý tarıhy» dep aıtty. Al osy rette «Táýelsizdik dáýiri» degen kitap bizdiń kópten kútken dúnıemiz edi. Ony tarıhshylarmyz jaza almady. Shyndyǵyna kelgende bul Táýelsiz Qazaqstannyń tarıhy, táýelsizdigimizdiń taǵylymy», - dedi Myrzataı Joldasbekov.
Onyń paıymynsha, Qazaqstan Prezıdentiniń bul kitabyn elimizdiń barlyq mektepterinde, joǵary oqý oryndarynda, qajet bolsa joǵary keńselerde de oqytý kerek.
Sonymen qatar dóńgelek ústel barysynda QR Parlamenti Májilisiniń depýtaty Qýanysh Sultanov Elbasy Nursultan Nazarbaevtyń elimizdiń shekarasyn shegendeýdegi eren eńbegine keńinen toqtalsa, aqyn Nesipbek Aıtuly elordamyzdy Almatydan Astanaǵa kóshirýdegi kóregendigine qatysty oılarymen bólisti.
Al saıası ǵylymdar doktory Náýbet Qalıev atalǵan kitap qurylymynyń barsha oqyrman qaýymǵa paıdaly ekendigin basa aıtty.
«Eń aldymen Prezıdent bul kitabynda búkil eldiń tarıhı kezeńin jańǵyrý kategorııasymen taldaıdy. Bul saıasattaný ǵylymynda sońǵy 50 jylda ábden sińisti bolǵan. Biraq, biz órkenıetten kesh qalyp, ony paıdalanbadyq. Ótken ǵasyrdyń 50-shi jyldarynan bastap álemde 70-ke jýyq memleket paıda boldy. Solardyń barlyǵy jańǵyrý jolyna tústi nemese túsýge tyrysty. Biraq, bári sheshe almady. Óıtkeni, memleket qurý óte qıyn. Al bul kitaptan shyǵatyn qorytyndy, bizdegi jańǵyrý joǵarydan bolýda. ıAǵnı, Elbasynyń memleket qurýshylyq eńbeginiń nátıjesi», - dedi ol.
