«Táýelsizdik» bıdaı sorty alǵashqy ónimin berdi
ASTANA. QazAqparat - QR Táýelsizdiktiń 25 jyldyǵyna arnap shyǵarylǵan «Táýelsizdik» sorty alǵashqy ónim berdi, dep habarlaıdy QazAqparat tilshisi.
Bul týraly Ortalyq kommýnıkatsııalar qyzmetinde aýyl sharýashylyǵy ǵylymdarynyń doktory, Aýyl sharýashylyǵy ǵylymdary akademııasynyń akademıgi, «A.I. Baraev atyndaǵy AShǴÓO» JShS dırektory Kenje Abdýllaev málim etti.
Ǵalymnyń aıtýynsha, jańa bıdaı sorty ózgelermen salystyrǵanda sýyqqa tózimdi keledi jáne onyń sapasy aıtarlyqtaı joǵary.
«Byltyr QR Táýelsizdiginiń 25 jyldyǵy qurmetine arnaıy bıdaı sorty shyǵaryldy jáne synaqtan ótkizildi. Bıyl sorttyń alǵashqy ónimi alyndy. Basqalarmen salystyrǵanda, sapasy joǵary bolyp shyqty. Sýyqqa da tózimdi keledi", - dedi K.Abdýllaev Ortalyq kommýnıkatsııalar qyzmetinde ótken baspasóz máslıhatynda.
K.Abdýllaevtyń málimdeýinshe, atalǵan sort SQO, Arqalyq, Qaraǵandyda ornalasqan tájirıbelik sharýashylyqtarǵa jiberiledi. Sol sharýashylyqtarda aprobatsııadan ótken soń, kóbeıtiledi jáne ózge óńirler men sharýashylyqtarǵa taratylady.
