«Táýelsizdik - baǵa jetpes qundylyq» - Respýblıkalyq basylymdarǵa sholý
***
Keshe Memleket basshysy Nursultan Nazarbaev Parlament palatalarynyń birlesken otyrysynda bıylǵy jylǵy halyqqa joldaǵan Joldaýyn jarııa etti. Joldaýdyń mátini «Egemen Qazaqstan» gazetiniń búgingi sanynda jarııalandy.
Sondaı-aq atalmysh basylymda «Táýelsizdik - baǵa jetpes qundylyq» atty maqala jaryq kórdi. Onda keshe Aqordada Memleket basshysy Nursultan Nazarbaevtyń tórǵalyq etýimen ótken Qazaqstan Respýblıkasy Táýelsizdiginiń 20 jyldyǵynyń mereıtoıyn ótkizýge arnalǵan keńeste kóterilgen máseleler týraly baıandalady. Memleket basshysy keńeste sóılegen sózinde Qazaqstan halqyna Joldaýyn barsha qazaqstandyqtarǵa túsindirý jumystaryn jan-jaqty júrgizý úshin Úkimetke, memlekettik organdarǵa, «Nur Otan» partııasyna tapsyrmalar berdi. Prezıdent, sondaı-aq el Táýelsizdiginiń 20 jyldyǵyn keń kólemde atap ótýge baılanysty oıyn ortaǵa sala kelip, osy jyldar ishinde Qazaqstannyń qol jetkizgen tabystaryn qazaqstandyqtarǵa ǵana emes, shet memleketterge de tanystyrý qajettigin atap kórsetti. Táýelsizdik - bizdiń eń basty ıgiligimiz, baǵa jetpes qundylyǵymyz, dedi Prezıdent osy jaıynda.
Sondaı-aq basylym aıqara betti «Armysyń, aq Azıada» atty aıdarmen erteń jalaýy kóteriletin VII qysqy Azııa oıyndaryna arnaǵan. Onda Almaty qalasynyń ákimi Ahmetjan Esimovpen jáne Azıadada óner kórsetetin sportshylarmen suhbattar, mamandardyń pikirleri, qysqasha aıtqanda, Azıada týraly kóptegen aqparattar alýǵa bolady.
***
«Aıqyn» basylymynyń búgingi sanynda «Bilim men ǵylymdy damytýdyń jańa deńgeıin aıshyqtaıdy» atty maqala jarııalandy. Onda Memleket basshysynyń bıylǵy Joldaýyndaǵy bilim salasyn jetildirýge qatysty mindetter jóninde baıandalady. Maqala avtorynyń jazýynsha, bıylǵy Joldaýda bilim men ǵylymdy damytý máselesine úlken kóńil bólindi. Áleýmettik modernızatsııalaý baǵdarlamasy negizinde jańa áleýmettik saıasatty basshylyqqa alyp, bilim berý protsesin modernızatsııalaý, barlyq bilim salasyn tolyq kompıýtrlendirý, mýltı-medıa synyptaryn jabdyqtaýdy aıaqtaý, ınteraktıvti taqtalarmen tolyq qamtamasyz etý, 12 jyldyq bilim berýdi 2020 jyly tolyq aıaqtaý, ómir boıy bilim alý prıntsıpin basshylyqqa alý, kásiptik-tehnıkalyq bilim berý júıesin ary qaraı jetildirý sııaqty asa mańyzdy jalpyhalyqtyq ulttyq mindetter bizge kóp jaýapkershilik júktep otyr. Sondyqtan da bolar Elbasymyzdyń Prezıdenttik ókilettiligin 2020 jylǵa deıin uzartý týraly jalpyhalyqtyq referendým ótkizý jónindegi bastamany tarazdyqtar men ınstıtýt jastary men ǵalymdary, oqytýshylary biraýyzdan qabyldap otyr.
Sondaı-aq atalmysh basylym búgingi sanynda «Dúbirli jarystarǵa daıarmyz ba?» atty maqala jarııalady. Maqala avtorynyń jazýynsha, Astana men Almaty qalalarynda jalaýy jelbireıtin aıtýly dodada sporttyń 11 túri boıynsha 64 medal jıyntyǵy sarapqa salynady. «Komandalyq eseptegi negizgi básekelestik Qytaı, Japonııa, Ońtústik Koreıa jáne Qazaqstan quramalary arasynda órbıtini anyq. Bizdiń sportshylardyń aldyna qoıylǵan negizgi maqsat - ozyq úsh komandanyń qatyrynan kóriný. Osy jospardy jerlesterimiz oıdaǵydaı júzege asyratynyna senimdimiz», deı kele avtor qysqy Azııa oıyndaryna qatysatyn sport túrlerinen qandaı jetistikterge jetýimiz múmkin ekendigine saraptama jasaıdy.
***
«Alash aınasy» basylymynyń búgingi sanynda «Ulttyq qysqy oıyndarymyz bar ma?» atty taqyrypta maqala basyldy. Atalmysh maqala avtorynyń jazýynsha, erteń qazaq topyraǵynda VII qysqy Azııa oıyndarynyń alaýy tutanady. «Ókinishke qaraı, osynaý dúbirli dodany óz jerimizde ótkizip otyryp, onyń baǵdarlamasyna birde-bir ulttyq oıynymyzdy, sporttyq ónerimizdi qosa almadyq. Nege? Onyń basty sebebi - «qazaqta qysqy ulttyq sport túri joq-mys. Qazaqtyń ulttyq oıyndarynyń bári jazǵy sport túrleri eken». Bul qazirgi mamandardyń aıtyp júrgen ýájderi. Al shyn máninde qazaqtar erteden qan sonarda ańǵa shyǵyp, búrkit salǵan. Bul sport, óner emes pe? Sporttyq óner bolmasa, saıatkerlik óner nege ulttyq oıyndar federatsııasynyń quramyna engizilgen. Sondyqtan saıatkerlikti sport emes deý ábestik», delingen maqalada.
Sondaı-aq atalmysh basylymda jarııalanǵan «TMD elderi arasynda iri dodany alǵash bolyp Qazaqstan qabyldap otyr» atty suhbat jarııalanǵan. Onda dańqty sportshy Vladımır Smırnov óziniń elimizde ótetin qysqy Azııa oıyndaryna qatysty oılarymen bólisedi. Sportshynyń aıtýynsha, Qazaqstan sportshylary jalpykomandalyq esepte úshinshi oryndy ıelenedi. «Buǵan bizdiń áleýmetimiz jetedi. Tipti odan da joǵary oryndarǵa da talasýymyzǵa da múmkindik bar. Álbette, basty qarsylasymyz, ádettegideı, qytaı, japon, káris sportshylary bolmaq. Degenmen osylardyń bireýin jalpykomandalyq esepte tómen syrǵytýǵa shamamyz jetedi. Tek sportshylarymyz úmitti aqtasa, bolǵany»,-deıdi V.Smırnov. Atalmysh suhbatty «Alash aınasy» basylymynyń búgingi sanynan oqısyzdar.
***
«Kazahstanskaıa pravda» basylymy búgingi sanynda Memleket basshysynyń bıylǵy Joldaýynda kórsetilgen mindetterge qatysty ǵalymdar men saıasatkerlerdiń jáne elimizdegi kóptegen sala mamandarynyń pikirlerin jarııalapty. Májilis depýtaty Meıram Pishembaevtyń pikirinshe, álem qarjylyq daǵdarystyń saldaryn saralap jatqanda, bizdiń elimiz óziniń daǵdarystan keıingi jetistikterin sóz etýde. Qazaqstan bul qıyndyqty da abyroımen eńsere bildi. Nátıjesinde ekonomıkamyz órlep, elimizdiń altyn qory ulǵaıdy. Sonaı-aq bankterdiń syrtqy qaryzdary azaıdy. Al depýtat Ashat Bekenov Joldaýda áleýmettik máselelerdiń keńinen kórinis taýyp otyrǵandyǵyn aıtady. Mamandardyń Joldaýda kórsetilgen sharalarǵa qatysty pikirlerin «Kazahstanskaıa pravda» basylymynyń búgingi sanynan oqısyzdar.
