Táýelsizdik alǵaly beri Qazaqstanda 820 polıtseı qyzmet babynda qaza tapqan
ASTANA. QazAqparat - Táýelsizdik alǵaly beri Qazaqstanda 820 polıtseı qyzmet babynda qaza taýyp, 2232-si túrli jaraqat alǵan, dep habarlaıdy «QazAqparat» HAA tilshisi.
Bul týraly OKQ-da ótken baspasóz máslıhaty barysynda QR ІІM Memlekettik til jáne aqparat departamentiniń dırektory Almas Sadýbaev aıtyp ótti.
«Elimiz Táýelsizdik alǵaly beri ishki ister organdarynyń 1026 qyzmetkeri memlekettik marapattarǵa ıe boldy. Olardyń 108-i qyzmet babynda qaza bolǵandar. Sonymen birge, osy aralyqta ishki ister organdarynyń 820 qyzmetkeri qyzmet babynda qaza tapqan. 2232 qyzmetker túrli jaraqat aldy. Bunyń bári - úlken erlik. Halyqtyń tynysh uıqysy, eldiń amandyǵyúshin atqaryp jatqan polıtsııa qyzmetkerleriniń jumysy. Sondyqtan, patrıottyq turǵyda el bolyp, jurt bolyp kez kelgen quqyq qorǵaý organynyń qyzmetkerin maqtan tutýymyz kerek dep esepteımiz», - deıdi Almas Sadýbaev.
Eske sala ketsek, búgin OKQ-da ótken baspasóz máslıhatynda Bas prokýrordyń keńesshisi Nurgúl Qaraǵoıshına Elbasynyń «Rýhanı jańǵyrý» baǵdarlamasyn júzege asyrý maqsatynda QR Bas prokýratýrasynyń bastamasymen «Rýhanı jańǵyrý - patrıotızm negizi» atty vedomstvoaralyq baıqaý ótetinin habarlaǵan bolatyn. Onyń aıtýynsha, bıylǵy baıqaýǵa 6 memlekettik organ qatysady. Olar - Bas prokýratýra, QR UQQ Shekara qyzmeti, Memlekettik kúzet qyzmeti, Memlekettik qyzmet jáne sybaılas jemqorlyqqa qarsy is-qımyl Agenttigi, QR Qorǵanys mınıstrligi men QR ІІM.
«Vedomstvoaralyq baıqaýǵa polıtsııa qyzmetkerleri de erekshe atsalysady. Biz tek qana qoldaımyz. Mundaı saıystar óte qajet», - deıdi Almas Sadýbaev.
