Táýelsizdigimizge nuqsan keltiretin halyqaralyq sharttar jasaýǵa jol berilmeıdi - Parlament
ASTANA. 16 qańtar. QazAqparat - Búgin QR Parlamenti Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine Qazaqstan Respýblıkasynyń halyqaralyq sharttar máseleleri boıynsha ózgerister men tolyqtyrýlar engizý týraly» QR zańy qabyldandy. Qujatqa birqatar Májilis depýtattary bastamashylyq jasaǵan bolatyn.
Parlament qabyldaǵan qujattyń maqsaty halyqaralyq sharttar salasyndaǵy zańnamany jetildirý bolyp tabylady jáne ol boıynsha qoldanystaǵy eki zańǵa tolyqtyrýlar men ózgertýler engiziledi. Atap aıtqanda, «Qazaqstan Respýblıkasynyń halyqaralyq sharttary týraly» jáne «Qazaqstan Respýblıkasynyń til týraly» zańdaryna ózgerister usynylyp otyr. Sonyń ishinde Qazaqstannyń ulttyq múddesine saı kelmeıtin, ulttyq qaýipsizdigimizge zalalyn tıgizýi múmkin nemese elimizdiń Táýelsizdigine nuqsan keltiretin halyqaralyq sharttardy jasasýǵa jol bermeıtin jańa norma engiziledi. Bul norma kelisimderdi daıarlaý men olardy júrgizýge qatysýshy memlekettik qyzmetshiler úshin negiz qalyptastyratyn bolady. Budan bólek, qazaq tili Qazaqstannyń memlekettigin aıqyndaıtyn basty faktor ekenin eske ala otyryp, Qazaqstan Respýblıkasynyń shet memlekettermen ekijaqty halyqaralyq sharttaryn Qazaqstannyń memlekettik tilinde jáne taraptardyń kelisýi boıynsha ózge de tilderde jasasýy usynylady.
