Táýelsizdigimizdiń arqasynda abyroıymyz asqaqtaǵan elge aınalyp, bolashaqqa bıik maqsattar qoıýdamyz - ákim M.Pirinbekov
ALMATY. 2 aqpan. QazAqparat /Ádilet Musahaev/ - Búgin Almaty qalasy Almaly aýdany ákimdiginde Elbasynyń bıylǵy Joldaýyn talqylaýǵa arnalǵan jıyn ótti.
Jıynǵa atalǵan aýdan turǵyndary, sot tóraǵalary, memlekettik jáne quqyq qorǵaý organdarynyń basshylary, máslıhat depýtattary, kásiporyndar men shaǵyn kásipkerlik, bilim, densaýlyq saqtaý salasynyń qyzmetkerleri, mádenıet qaıratkerleri, aýdandaǵy qoǵamdyq uıymdar ókilderi, páter ıeleri tutyný kooperatıvteriniń tóraǵalary, ǵylym salasynyń ókilderi men aýdanymyzdyń ardagerleri qatysyp, Joldaýda aıtylǵan mańyzdy jaıttar talqylanyp, baıandaldy.
Atalǵan aýdannyń ákimi Marat Pirinbekov Elbasynyń bıylǵy «Bolashaqty birge jasaımyz!» atty halyqqa Joldaýynda memleket ómiriniń barlyq salalary qamtylyp, aldaǵy atqarar jumystyń naqty mindetteri anyqtalǵandyǵyn aıtty. «Elbasy bıylǵy jyl biz úshin qasterli boldy dep ótken jyldy qorytyndylap, jyl boıy atqarylǵan asqarly isterdi sanamalap kórsetti. Bizdiń aýdan osy jolda joǵary salyqtyq kórsetkishterin, óndiristik ónim kólemin, halyqty jumyspen qamtý baǵdarlamalaryn nátıjeli iske asyrdy», -deıdi aýdan ákimi.
Sonymen qatar ol bıyl yntymaǵy jarasqan elimizdiń Táýelsizdiginiń 20 jyldyǵy ekendigin aıtyp ótti. «Táýelsizdik jyldary el Prezıdenti N.Nazarbaevtyń basshylyǵy men bir judyryqqa jumylǵan halqymyzdyń atqarǵan isteriniń nátıjesi, erteńge senimdi de, batyl qadamdar jasaýǵa dem beredi. Abyroıymyz asqaqtaǵan elge aınalyp, bolashaqqa bıik maqsattar qoıýdamyz. Osy joldaǵy barshamyz úshin ortaq mindet Elbasy Joldaýynda belgilengen maqsattardyń tıimdi oryndalýyn qamtamasyz etý jáne aýdannyń árbir turǵynyna jetkizý», -dep atap ótti óz sózinde M. Pirinbekov.
