Táýelsizdigimizdi sát saıyn qorǵaýymyz qajet - Bas múftı
ASTANA. QazAqparat - Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyuly barsha halyqty Qazaqstan halqy birligi kúnimen quttyqtady.
«Alla taǵalanyń jer betindegi barsha adam balasyn ártúrli ulttarǵa bólip, jaratýy - Jaratýshy Iemizdiń sheksiz danalyǵy. Qasıetti Quranda: «...Bir-birlerińdi tanyp-bilýleriń úshin senderdi halyqtar men rýlar etip jarattyq», - dep baıandalǵan. Qudaıǵa shúkir, elimiz turaqty damý ústinde. Saıyn dalany mekendegen san alýan ult pen ulystyń ókili tatý-tátti ǵumyr keship keledi. Osynyń bári halqymyzǵa bergen Allanyń syıy, ólsheýsiz rahymy desek, egemendi eldi jarqyn bolashaqqa bastaǵan el basshysyn taǵaıyndap berýi, Jaratýshy Iemizdiń taǵy bir úlken nyǵmeti. Halqymyz Táýelsizdikti toılap, ony máńgilik etýdi oılap júrgen joraly jurt ekenin álem moıyndady. Endeshe, Elbasy aıtqandaı, barshamyz Táýelsizdigimizdi sát saıyn qorǵaýymyz qajet», - deıdi Bas múftı.
Onyń aıtýynsha, Nursultan Ábishulynyń ıgi bastamasymen qurylǵan Qazaqstan halqy Assambleıasy barlyq etnostardy ortaq maqsatqa jumyldyryp, bereke men birliktiń uıytqysyna aınaldy.
«Din qaıratkerleriniń basyn qosyp, barsha halyqty dinı tatýlyq pen turaqtylyqqa úndegen eńseli Elordamyz - Astana rýhanı kelisimniń ordasy ekenin elimizdiń árbir azamaty maqtanyshpen aıtady. Bir shańyraq astynda, bir atanyń balasyndaı, tatý ómir súrip kele jatqan 100-den astam ult ókilderi Qazaqstannyń qaryshtap damýyna úlken úles qosýda. Ata Zańymyzda aıqyndap jazylǵandaı, azamattardyń dinı senimine erkindik berilgen. Bul - beıbit joldy basty baǵdar etken elimizdiń turaqtylyǵy men tutastyǵynyń úzdik úlgisi. Halqymyzdyń keń peıili, qonaqjaı, baýyrmal, darhan minezi keń baıtaq dalamyzda beıbitshiliktiń saltanat qurýyna negiz boldy. Uıymshyldyqqa umtylǵan ultymyz baqyttyń bastaýy - birlik dep bilgen», - deıdi Erjan qajy.
Múftı, elimizde 1 mamyr - Qazaqstan halyqtarynyń birligi kúni merekesiniń atalyp ótýiniń de úlken máni bar ekendigin atap ótti.
«Bul - ulttar men ulystardy yntymaqqa uıytatyn ıgi shara. Jastardy, búkil halyqty uıymshyldyqqa jumyldyrǵan mereıli mereke qutty bolǵaı!
Alla taǵala halqymyzdyń birligi men berekesin, aýyzbirshiligin arttyrǵaı. Táýelsizdigimizdi máńgilik etip, bolashaqqa basqan qadamymyzdy berekeli etkeı! Tilegimiz qabyl, muratymyz asyl bolǵaı!», - dep quttyqtady Bas múftı.
