Táýelsizdigimizdi qadirlep, ony jas urpaqtyń júregine uıalatý - Otanymyzdyń jarqyn bolashaǵynyń kepili - Elbasy
ASTANA. Qazannyń 26-sy. QazAqparat /Aıdar Ospanalıev/ - «Biz dúnıejúzi bir-birimen etene aralasyp, bite qaınasqan kezeńde ómir súrip otyrmyz. Álemdi sharpyǵan daǵdarys áli aıaqtalǵan joq.
Jahandyq sıpatqa ıe bolǵan qıyndyqtar qaıta aınalyp soǵýy múmkin. Sondyqtan eń qasterli qazynamyzdy - Táýelsizdigimizdi kózdiń qarashyǵyndaı saqtap, memlekettigimizdi nyǵaıta berý úshin bizge eń áýeli birlik kerek». Bul týraly búgin Qazaqstan halqy Assambleıasynyń 15-shi sessııasynda Memleket basshysy Nursultan Nazarbaev málim etti, dep habarlaıdy QazAqparat.
«Osy baılyǵymyzdy qadirleı bilip, ony jas urpaqtyń júregine uıalatý - Otanymyzdyń jarqyn bolashaǵynyń kepili bolmaq. Búkil Qazaqstan halqy men onyń árbir etnosynyń taǵdyry úshin eń aldymen Assambleıa músheleri jaýapty. Óıtkeni, olar birligi jarasqan Qazaqstannyń abyroıy men bedeliniń, ǵasyrlar boıy qalyptasqan jarasymdy salt-dástúrlerin jalǵastyrýshylar», dedi Prezıdent.
