«Táýelsiz ulttyń lıderi» - respýblıkalyq basylymdarǵa sholý
***
«Prezıdent elorda kúnine arnalǵan Saltanat saraıyndaǵy saltanatty qabyldaýǵa qatysty», - dep jazady «Egemen Qazaqstan» gazeti. Shara barysynda Elbasy qazaqstandyqtardy elorda kúnimen quttyqtady. Óz sózinde búgin elimiz kóleminde, Qazaqstannyń barlyq óńiri Qazaqstannyń elordasy kúnin, Astana qalasynyń merekesin merekelip jatqanyn atap ótken Memleket basshysy: «Sizderdiń barlyǵyńyzdy Elorda kúnimen quttyqtaımyn! Astana kúlli álemdi súısintýde jáne júzdegen jyldar boıy súısinte bermek. Astana - bizdiń Táýelsizdigimizdiń táji ispetti ásem qala. Astana - Qazaqstannyń qýatyn bildiretin qala. Astana - álemdik kóshbasshylar bas qosatyn oryn. Bul úmitter aqtalatyn, bizdiń jas qazaqstandyqtardy baqytqa bóleıtin qala. Bul - orasan epopeıa», - dedi.
«Egemen Qazaqstan» gazetiniń jazýynsha, Ortalyq saılaý komıssııasynyń tóraǵasy Qýandyq Turǵanqulovtyń tóraǵalyǵymen ótken Komıssııanyń keshegi otyrysynda QR Parlamenti Senaty depýtattyǵyna kandıdattardyń respýblıkalyq bıýdjet qarajatynan jabylatyn shyǵystarynyń normatıvteri belgilendi, sondaı-aq shyǵyp qalǵandardyń ornyna Mańǵystaý oblystyq saılaý komıssııasy men Astana qalasy saılaý komıssııasynyń múshelerin taǵaıyndaý týraly sheshim qabyldandy. Sonymen qatar OSK basshysynyń habardar etýinshe, 7 shildedegi jaǵdaı boıynsha Senat depýtattyǵyna barlyǵy 87 kandıdat usynylǵan. Ortasha eseppen alǵanda, bir depýtattyq mandatqa 5 úmitkerden kelip otyr. Eń kóp kandıdat usynǵan óńir Jambyl oblysy - 9 adam, jeti oblys 4 úmitkerden usynǵan. Olardyń ishinde 15 adamdy máslıhattar, al 72 kandıdat ózin-ózi usynǵandar. Usynylǵan kandıdattardyń ishinde 4 áıel bar. Úmitkerlerdiń 9-y Senattyń qazirgi kezdegi depýtaty bolyp tabylady. Maqala «Senat saılaýyna - 142 mıllıon teńge» degen taqyryppen berilgen.
***
«Aıqyn» gazetiniń búgingi nómirinde «Nur Otan» HDP Tóraǵasynyń birinshi orynbasary Nurlan Nyǵmatýlınniń «Táýelsiz ulttyń lıderi» degen kólemdi maqalasy jaryq kórdi. «Qazir Nursultan Ábishuly Nazarbaev - óz ómir jolyn endi bastaǵan jas qazaqstandyqtar - táýelsizdiktiń qurdastary úshin de, halyqaralyq deńgeıdegi tájirıbeli saıasatkerler úshin de úlgi bolyp otyrǵan tulǵa. Sol sebepti de bizdiń jalpyulttyq kóshbasshymyz Nursultan Ábishuly Nazarbaevtyń aty adamzat tarıhyndaǵy eń uly memlekettik qaıratkerlerdiń álemdik shejiresine altyn áriptermen jazyldy», - deıdi maqala avtory.
Qazaqstannyń negizinen agrarly el ekeni baıaǵydan belgili. Kezinde aýyl sharýashylyǵy jaqsy damyp, mıllıardtaǵan put astyqtan basqanbyz, myńǵyrǵan mal ósirip, júzdegen myń tonna et, sút, jún de óndirgenbiz. Kúrish pen júgeri, qant qyzylshasynan da joǵary ónim alyp edik. Baý-baqshamyz da eshkimnen kem emes-ti. Qazir de aýyl sharýashylyǵyna jyl saıyn orasan zor kólemde, tipti saladaǵy ishki jalpy ónimniń 10 paıyzyna deıin qarjy bólinip otyr. Sońǵy on jyldyń ózinde memleket agrarlyq salaǵa 7 mıllıard AQSh dollary kóleminde ınvestıtsııa baǵyttapty. Sharýa qojalyqtaryna memleket tarapynan qarjylaı qoldaý týrasynda «Aıqyn» gazetindegi «Sharýaǵa qoldaý bolmasa, aýylǵa ajar kire me?!» degen maqaladan bile alasyzdar.
***
«Alash aınasy» gazetinde KSRO jáne Qazaqstannyń halyq ártisi, Memlekettik syılyqtyń laýreaty Asanáli Áshimovpen aradaǵy suhbat «Qazir «aqsha bárin sheshedi» degen jaı ǵana uran emes, uǵymǵa aınalyp ketken sekildi» degen taqyryppen berilgen. Qoıylǵan barlyq saýaldarǵa tuşymdy jaýap bergen akter: «Qaı kezde, qaı jerde, qaı jaqta júreıik, elimizdiń namysy, elimizdiń ósýi men jaqsylyǵyn úlkeıtip, kórkeıtińkirep kórsetý, artyǵyraq aıtý ónerdiń paryzy dep bilemin. Óner qaı kezde de alda júrý kerek. Ónerdiń úıreter úlgisi, taǵylymy kóp. Sondyqtan ónerge degen kózqaras jáne onyń erteńi el bolashaǵymen sabaqtas bolýy tıis. Demek, qarym-qatynas qajet», - deıdi.
«Malaızııanyń Penang qalasynda aýyr atletıkadan jastar arasyndaǵy álem chempıonaty óz máresine jetti. Qorjynymyzǵa túskeni - bir altyn, eki kúmis, bir qola. Sóıtip, jalpykomandalyq esepte Qytaı, Reseı jáne Iran sportshylaryn alǵa jiberip, tórtinshi orynǵa turaqtadyq», - de jazady «Alash aınasy» gazeti. Basylymnyń atap ótýinshe, Qazaq eliniń qorjynyna jalǵyz altyndy basty úmitkerimiz bolǵan Nadejda Nogaı saldy. Dúbirli dodada júldeli oryndarǵa ıe bolǵan sportshylarymyz jaıynda tereńirek bilgińiz kelse, basylymnyń búgingi nómirindegi «Bizde altyn da bar, kúmis te bar, qola da bar» degen maqalaǵa nazar salyńyz.
***
«Reseı Federatsııasynyń Prezıdenti Dmıtrıı Medvedev Qazaqstan Prezıdenti Nursultan Nazarbaevpen telefon arqyly sóılesti», - dep jazady «Kazahstanskaıa pravda» gazeti. Basylymnyń atap ótýinshe, Dmıtrıı Medvedev Nursultan Nazarbaevty týǵan kúnimen quttyqtap, eń izgi tilekterin, densaýlyq, jaqsylyq pen Qazaqstannyń joǵarǵy memlekettik jumysynda jemis tiledi. Áńgime barsynda eki eldiń prezıdentteri aǵymdaǵy jyldyń tamyz aıy men qyrkúıek aıynyń basyna josparlanǵan kópjaqty forýmdar aıasyndaǵy baılanys josparyn talqylap, aımaqtyq turaqtylyq pen qaýipsizdikti qamtamasyz etý isindegi úılesimdilikti tereńdetý máselesin qozǵady.
