Táýelsiz saraptama elimizdiń burynǵy ishki ister mınıstri S. Baımaǵanbetovtiń denesinen esh jaraqat tappady

Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR ІІM Qylmystyq atqarý júıesi komıteti tóraǵasynyń mindetin atqarýshy Teńizjan Jánibekov málim etti.

«Ótken jyldyń qarashasynda aıyptaý úkimi zańdy kúshine endi jáne ol (S.Baımaǵanbetov) sottalǵan burynǵy quqyq qorǵaý organdary qyzmetkerleri men sottar qamaýda ustalatyn AK-159/6 kolonııasyna jetkizildi. Atalǵan kolonııaǵa jetkizilgennen keıin buıryqqa jáne normatıvtik quqyqtyq aktilerge sáıkes ol qabyldanyp, tolyq tintýden ótti. Osyndan keıin ol 15 táýlikke deın qamaýda bolatyn karantındik bólmege qamaldy. Dál sol kúni advokattar tarabynan ony qorlady, mazaq qyldy, dene jaraqatyn saldy degen aryz tústi», - dedi ol.

Onyń sózine qaraǵanda, oqıǵa ornyna ózindik qaýipsizdik qyzmetiniń qyzmetkerleri baryp, tyńǵylyqty tergeý jumystaryn júrgizdi. Olardyń qorytyndysyna sáıkes qylmystyq is júrgizýden bas tartý týraly qaýly qabyldandy. S.Baımaǵanbetov tarabynan úsh shaǵym túsken. Osydan keıin kóshpeli táýelsiz sot-medıtsınalyq sarapshylary baryp, sottalýshydan esh dene jaraqatyn tappaǵan.

T.Jánibekovtiń sózine qaraǵanda, osy taqyrypqa qatysty BAQ-ta jaryq kórgen barlyq jarııalanymdar ótken jylǵy oqıǵalar tóńireginde órbigen. Sońǵy ýaqytta S.Baımaǵanbetov tarabynan esh shaǵym túspegen.