Táýelsiz sarapshylardyń tizilimi Qazaqstanda qalaı jasalady

NUR-SULTAN. QazAqparat - Sybaılas jemqorlyqqa qarsy saraptama júrgizý tiziliminiń sarapshysy, fılosofııa ǵylymdarynyń kandıdaty Svetlana Arystambekova atalmysh tizilimniń qalaı ázirlenetinin aıtty, dep habarlaıdy QazAqparat tilshisi.

«Biz QR Sybaılas jemqorlyqqa qarsy is-qımyl agenttigi táýelsiz sarapshylardyń tizilimin qalyptastyrý turǵysynan aıtarlyqtaı aıqyn ustanymǵa ıe ekenin kórip otyrmyz. Bul degenimiz, birinshiden, qajetti quzyretke ıe, ekinshiden, sybaılas jemqorlyqqa jáne basqa da qylmystyq, ákimshilik jaýapkershilikke tartylmaǵan barlyq adamdar osy tizilimge kire alady degendi bildiredi. Sonymen qatar, sarapshylar ǵylymı turǵyda saýatty, zertteý tili, lıngvıstıkalyq, termınologııalyq apparatty meńgergen bolýy qajet», - dedi Svetlana Arystambaeva «AntıkorLive» jobasynda.

Ol sarapshylardy irikteý protsesine de toqtalyp ótti.

«Bizde sarapshylardy irikteý protsedýrasy óte jaqsy oılastyrylǵan jáne uıymdastyrylǵan. Parlamentarızm qory sybaılas jemqorlyqqa qarsy saraptamanyń sapasyn qamtamasyz etý úshin kóptegen daıyndyq jumysyn júrgizdi. Búgingi kúni sarapshynyń jumysy uıymdastyrýshylyq jáne qurylymdyq turǵydan jeńildetilgen, óıtkeni bizde «Saraptama» qosymshasy bar. Bul sarapshylarǵa ózine qatysy joq nársege tereń úńilýge múmkindik bermeıdi», - deıdi ol.