Táýelsiz sarapshy Qazaqstandaǵy dızel «tapshylyǵyna» qatysty pikir bildirdi
ALMATY. QazAqparat - Qazaqstanda dızel tapshylyǵy joq. Mundaı pikirdi táýelsiz sarapshy Oljas Baıgeldıev aıtty, dep habarlaıdy QazAqparat tilshisi.
«Jalpy elde dızel otynyna tapshylyq joq. Keıbir janarmaı beketterinde tapshylyq bolýy múmkin. Bul – qalypty jaǵdaı. Máselen, dúken sórelerinde nan taýsylýy múmkin ǵoı. Ony basqa dúkennen satyp alýǵa bolady. Búgingi másele dál sondaı», - deıdi Oljas Baıgeldıev.
Sonymen qatar, ol janar-jaǵarmaı beketterinde paıda bolǵan uzyn-sonar kezektiń de sebebin túsindirdi.
«Qazaqstanda tranzıttik kólikterge janarmaı quıylady. Aýyr kólikter júzdegen lıtr dızel quıady. Ol biraz ýaqytty alady. Dál osy kezde janarmaı beketterinde kezek paıda bolady. Adamdar alańdaıtyn nárse kórip turǵanym joq. Shymkenttegi munaı óńdeý zaýyty jóndeýden keıin qaıta iske qosylyp, óńirlerge dızel tasymaldaý jandandy. Al, baǵasyna keler bolsaq, bul osyndaı sátti paıdalanyp, paıda tapqysy keletin jekelegen janarmaı beketteriniń isi»,- deıdi sarapshy.
QR Energetıka mınıstrliginiń deregine súıensek, qazir munaı ónimderiniń qory jetkilikti deńgeıde.
«23 maýsymdaǵy jaǵdaı boıynsha, Almaty qalasynda Aı-92 markaly benzınniń jıyntyq qory 30,3 myń tonnany quraıdy. Bul, óńirdiń 19 táýliktik qajettiligin qamtýǵa jetkilikti. Dızel otyny boıynsha qor 10,9 myń tonnany quraıdy. Bul, óńirdiń 18 táýliktik qajettiligin qamtýǵa jetkilikti. Aı-92 benzıni boıynsha aı saıynǵy tutyný 48,9 myń tonnany (táýligine 1,6 myń tonna), dızel otyny boıynsha 18,3 myń tonnany (táýligine 0,6 myń tonna) quraıdy.
Búgingi kúni Almaty qalasy JMQS-nyń AI-92 benzıni boıynsha bólshek saýda baǵasy lıtrine 169-dan 175 teńgege deıin, dızel otyny boıynsha lıtrine 192-den 205 teńgege deıin dıapazonda tur», - dep habarlady QR Energetıka mınıstrliginiń baspasóz qyzmetinen.
