Táýelsiz memleketti bıik deńgeıge jetkizetin múmkindik jastar qolyna berilip otyr
ALMATY. Jeltoqsannyń 15-i. QazAqparat /Ádilet Musahaev/ - «Mádenı mura» memlekettik baǵdarlamasy - ózimizdiń tamyrymyzdy qaıta tanýǵa múmkindik berip otyrǵan birden bir baǵdarlama.
Bul jaıynda «Ynsap» jastar qoǵamdyq qorynyń tóraǵasy Saıat Ybyraev jastar birlestikteriniń jıynynda aıtty, dep habarlaıdy QazAqparat.
Onyń paıymdaýynsha, «Mádenı mura» baǵdarlamasy negizinde kóptegen ıgi is-sharalar júzege asyp, jastar óziniń ótkenin saralap, tarıhyn bilýge múmkindik aldy. «Búgingi kúnniń táýelsizdigi 500 jylda birinshi ret berilip otyrǵan múmkindik, talaı jyl boıy qazaq halqy osy táýelsizdik jolyn ańsap, kúresip kelgen bolatyn. Mine endi búgingi táýelsiz memleketti qaıtadan úlken deńgeıge jetkizetin múmkindik jastardyń qolyna berilip otyr. Endigi kezekte bul jastardyń ulttyq negizi bolýy kerek, ulttyq dúnıetanymy, kózqarasy bolý kerek. Osy baǵyttaǵy memlekettiń bizge jasap otyrǵan múmkindigi «Mádenı mura» baǵdarlamasy dep bilem», deıdi S. Ybyraev. Sonymen qatar ol halyq jaýy dep talaı atylyp ketken atalarymyzdyń muralaryn qaıtadan qalpyna keltirip jatqandyǵyn jetkizdi. «Babalar sózi», Qyzylordanyń «Jyraýlar mektebin» alatyn bolsaq, onyń ózinen birneshe tomdyq kitaptar shyǵyp jatyr», deıdi ol. Sondaı-aq «Ynsap» qoǵamdyq qory Shákárim mauralaryn qaıtadan jańǵyrtýǵa kúsh salyp jatqandaryn aıtty. «Adamdyq boryshyń» atty úlken jobany bastap Almaty, Astana jáne Taldyqorǵan qalalarynda oqýshylar arasynda Shákárim shyǵarmalaryn jatqa aıtýshylar baıqaýyn ótkizdik», deıdi «Ynsap» jastar qoǵamdyq qorynyń tóraǵasy.
