Táýelsiz Qazaqstannyń jańa saıası dáýiri bastaldy – Erlan Qoshanov

ASTANA. QazAqparat – Táýelsiz Qazaqstannyń jańa saıası dáýiri bastaldy. Bul týraly AMANAT partııasynyń - QR Parlamenti Májilisiniń tóraǵasy Erlan Qoshanov aıtty, dep habarlaıdy QazAqparat tilshisi.

«Búgingi alqaly Quryltaıymyzdyń mańyzy da, maqsaty da, saıası salmaǵy da aıryqsha! Biz pandemııadan keıin partııamyzdyń eń úlken jıynyn osyndaı formatta ótkizip jatyrmyz. Buǵan deıin qaýipti keseldiń saldarynan bir-birimizben kózbe-kóz júzdesýge múmkindik bolǵan joq. Sizder ár óńirdiń amanatyn arqalap, aýyl-aımaqtaǵy el-jurtymyzdyń atynan kelip otyrsyzdar. Búgin erkin áńgime, mazmundy talqylaý bolady dep oılaımyn», - dedi Erlan Qoshanov AMANAT partııasynyń kezekten tys XXIV sezinde.

Ol qazir kúlli álem kúrdeli kezeńdi bastan ótkeráp jatqanyn, al, Qazaqstan – alyp jer sharynyń bir bólshegi ǵana ekenin basa aıtty.

«Keıingi jyldar bizdiń elimiz úshin de ońaı bolǵan joq. Degenmen, eli miz syndarly saıasat, batyl qadamdar arqyly qoǵamnyń birligin, halqymyzdyń tatýlyǵy men tutastyǵyn saqtaýdyń úlgisin kórsetip otyr. Keshegi Jalpyhalyqtyq referendým men Konstıtýtsııalyq ózgeristerden keıin Táýelsiz Qazaqstannyń jańa saıası dáýiri bastaldy. Zamannyń aǵymyna saı partııanyń aty ǵana emes, zaty da ózgerdi. Tuǵyrnamasy túbegeıli qaıta jazylyp shyqty», - dedi partııa tóraǵasy.

Partııa tóraǵasy Memleket basshysy halqymen birge kórgenin, bel ortasynda bolǵan, qıyndyqtyń bárin toıtaryp, elin alǵa bastap kele jatqanyn basa aıtty.

«Jyl basyndaǵy «Qańtar oqıǵasy»Qazaqstan tarıhyndaǵy eń aýyr kezeńniń biri boldy. Bul memlekettiń irgesin sógip, shańyraǵyn shaıqaltýǵa baǵyttalǵan teris pıǵyldy kúshterdiń qasaqana áreketi edi. Sol aýyr sátterde Prezıdentimiz búkil jaýapkershilikti óz moınyna alyp, elimizdiń bolashaǵy úshin shuǵyl ári batyl sheshimder qabyldady. Kók Baıraǵymyzdy qulatpaı, óz tuǵyrynda saqtap qaldy», - dedi ol.