«Táýelsiz Qazaqstannyń qalyptasýy men damýyndaǵy áıelderdiń róli» - Almatydaǵy dóńgelek ústel
ALMATY. 1 shilde. QazAqparat /Názıra Eleýhan/ - Qazaqstan genderlik saıasat boıynsha kóptegen elderdiń aldynda keledi, onyń ishinde keıbir Eýropa elderiniń kósh basynda tur. Bul týraly búgin Almatyda «Táýelsiz Qazaqstannyń qalyptasýy men damýyndaǵy áıelderdiń róli» atty dóńgelek ústelde aıtyldy.
Almaty qalasy ákimdigi janyndaǵy Áıelder isteri jáne otbasylyq-demografııalyq saıasat jónindegi komıssııa tóraǵasynyń orynbasary, professor Gúlnaz Ahmetovanyń aıtýynsha, jasampazdyq pen ataýly oqıǵalarǵa toly Qazaqstan táýelsizdiginiń 20 jyly ekonomıkada, saıasatta, bızneste, mádenıette kóshbasshy áıelderdiń qalyptasýyna úlken yqpal etti. "Búginde názik jandylar ókili QR Parlamentti depýtatary arasynda, mınıstrlik pen jergilikti atqarýshy organdarynyń jetekshiliginde bar. Degenmen, Qazaqstanda áıelder sheshim qabyldaýshy oryndarda az. Búginde áıelderdiń kópshiligine, olardyń umtylysyna qaramastan bılikke jetýi ońaı emes. Áıelderge saıası erkindik kerek",-dedi ol.
Onyń aıtýynsha, áıelder qandaı jaǵdaıda bolmasyn, «otbasy-oshaq qasy» máselesin umytpaýlary qajet.
Bas qosýǵa qatysqan áıelderdiń pikirinshe, kóshbasshy bola bilgen áıel eki jaqty da qatar alyp júre bilýi kerek. Olardyń pikirinshe, áıel - el bolashaǵynyń tárbıeshisi. "Qoǵamda oryn alyp jatqan nashaqorlyq, balalar ólimi, jasóspirimder arasyndaǵy sýıtsıd syndy máselelerdiń aldyn alý otbasydan bastalady",-deıdi dóńgelek ústelge qatysýshylar.
Atalmysh shara qala ákimdigi men Almaty qalasynyń Іsker áıelder qaýymdastyǵynyń uıymdastyrýymen ótti.
Sharanyń maqsaty - áıelder qaýymynyń 20 jyl ishindegi memlekettiligimizdi nyǵaıtýdaǵy atqarǵan isteri men jetistikterin saralaý, olardyń qoǵamdyq ómirge belsendi aralasýǵa yntalaryn arttyrý bolyp tabylady.
Dóńgelek ústelge Almatynyń kóshbasshy-áıelderi - Bostandyq aýdanynyń ákimi Záýresh Amanjolova, Qazaqstannyń Іsker áıelder qaýymdastyǵynyń tóraıymy Raýshan Sársenbaeva, QR Ulttyq kitaphananyń Bas dırektory Gúlısa Balabekova, maslıhat depýtaty, QR Tutynýshylar Ulttyq lıgasynyń prezıdenti Svetlana Romanovskaıa jáne qalanyń basqa da tanymal áıelderi qatysty.
