Táýelsiz Qazaqstan tarıhy týraly eńbekterdiń bıblıografııalyq kórsetkishi jaryqqa shyqty
ASTANA. 11 maýsym. QazAqparat - /Marlan Jıembaı/ - Qazaqstan Respýblıkasynyń Ulttyq Akademııalyq kitaphanasynda QR BǴM Memleket tarıhy ınstıtýty ǵalymdarynyń el táýelsizdiginiń 20-jyldyǵyna arnap ázirlegen «Táýelsiz Qazaqstan tarıhy týraly eńbekterdiń bıblıografııalyq kórsetkishi» atty kitaptyń tusaýkeseri ótti.
Qazaqstan táýelsiz el bolǵanynan beri zertteý taqyryby qazirgi memlekettiń ózekti máselelerine arnalǵan tarıhshy-ǵalymdardyń, saıasattanýshylardyń, fılosoftardyń, áleýmettanýshylardyń, ekonomısterdiń, otandyq jáne sheteldik ǵalymdardyń talaı eńbekteri jaryq kórdi. Ókinishke oraı, olardyń biri oqyrmandarǵa tanys bolǵanymen, endi bireýleri olarǵa belgisiz bolyp qalýda. Sońǵy faktordy negizge ala otyryp, Memleket tarıhy ınstıtýtynyń ǵalymdary táýelsizdik dáýirinde basylyp shyqqan keń kólemdegi ǵylymı eńbekterdiń, qazirgi Qazaqstan tarıhy taqyrybyna jazylǵan jarııalanymdaryń, otandyq jáne sheteldik ǵalymdardyń eńbekteriniń basyn qurastyryp bıblıografııalyq kórsetkishti oqyrmandar nazarlaryńa usynyp otyr. Atalǵan kórsetkish 1991-2011jj. aralyǵyndaǵy kezeńdi qamtıdy. 176 betten turatyn bıblıografııalyq kórsetkishtiń qurylymy alǵysózden jáne II taraýdan turady.
«Qazaqstan Respýblıkasynyń Tuńǵysh Prezıdenti - Elbasy N.Á. Nazarbaevtyń táýelsizdik dáýirindegi jarııalanǵan eńbekteri» dep atalatyn birinshi taraýda Qazaqstan Respýblıkasynyń Tuńǵysh Prezıdenti - Elbasy N.Á. Nazarbaevtyń óz qalamynan shyqqan jáne Táýelsizdikti alý kezeńinen bastap qazirgi kúnge deıingi respýblıkanyń damý erekshelikterin aıqyndaıtyn eńbekteri, Qazaqstan halqyna arnaǵan Joldaýlary, maqalalary, Memleket basshysynyń sóılegen sózderi men suhbattary, Elbasy týraly jazylǵan otandyq jáne sheteldik avtorlardyń eńbekteri toptastyrylǵan.
Kórsetkishtiń ekinshi taraýynda táýelsiz memlekettiń ishki jáne syrtqy saıasatyna, memlekettiń ekonomıkalyq, áleýmettik-mádenı damýyna qatysty tematıkalyq enbekter júıelenip, ár jyldary merzimdi basylymdarda jarııalanǵan táýelsiz Qazaqstan tarıhy boıynsha maqalalar toptastyrylǵan.
Tusaýkeser rásiminde sóz sóılegen Memleket tarıhy ınstıtýtynyń dırektory, tarıh ǵylymdarynyń doktory, professor B. Aıaǵan usynyp otyrǵan kórsetkishtiń erekshelikterine toqtalyp ótti. «Atalǵan kórsetkish táýelsiz Qazaqstannyń tarıhynda tuńǵysh ret shyǵarylyp otyr. Búgingi kúnge deıin mundaı bıblıografııalyq kórsetkish bolǵan emes. Kórsetkish stýdentterge, magıstranttarǵa, ǵalymdarǵa paıdaly. Kez-kelgen zertteýshi - Táýelsizdik taqyryby boıynsha shyqqan ádebıetter týraly derekterdi kórsetkishten taba alady. Atalǵan kórsetkish týraly málimet Memleket tarıhy ınstıtýtynyń saıtyna ornalastyrylady», - dedi ǵalym sózinde.
Memleket tarıhy ınstıtýtynyń Eýrazııalyq jáne salystyrmaly saıası zertteýler bóliminiń jetekshi ǵylymı qyzmetkeri, tarıh ǵylymdarynyń kandıdaty, dotsent S. Selıverstov kez-kelgen taqyrypty zertteý derekterden bastalsa, al derekter bıblıografııalyq kórsetkishten bastalatyndyǵyn alǵa tartty.
Astana qalasyndaǵy J. Jabaev atyndaǵy № 4 mektep-gımnazııasynyń tarıh pániniń muǵalimi, pedagogıka ǵylymdarynyń kandıdaty J. Dúısen kitaptyń qundylyǵyna, taptyrmaıtyn oqý quraly ekendigine erekshe ekpin túsirdi.
Jıyn sońynda Instıtýt dırektory B. Aıaǵan jınalǵan jurtqa, Ulttyq Akademııalyq kitaphananyń qyzmetkerlerine alǵysyn bildirip, jaryqqa shyqqan kitaptyń birneshe danasyn kitaphana dırektory J. Shaımuhanbetovaǵa syılady.
