«Táýelsiz Qazaqstan: qazirgi zaman ádebıetiniń antologııasy» 3 tomdyǵynyń tusaýkeseri ótedi

ASTANA. QazAqparat - 30 maýsym kúni Almatydaǵy Ulttyq kitaphanada 3 tomdyq «Táýelsiz Qazaqstan: qazirgi zaman ádebıetiniń antologııasy» kitabynyń tusaýkeseri ótedi. Qazaqstan Jazýshylar odaǵy, «Tárjiman» ádebı aýdarmashylar odaǵy jáne Reseı Jazýshylar odaǵynyń qatysýymen daıyndalǵan basylym ústimizdegi jyldyń basynda Máskeýdegi «Hýdojestvennaıa lıteratýra» baspasynan jaryq kórgen edi.

Aıta keteıik, kitapqa enetin shyǵarmalardy irikteýde, olardy orys tiline aýdaryp, kórkem ári sapaly etip shyǵarýda belgili qazaqstandyq túrkitanýshy ǵalym, jazýshy Nemat Kelimbetov atyndaǵy qor zor qoldaý kórsetti.

Antologııanyń «Dombyra men besik» dep atalatyn alǵashqy tomy balalar ádebıetine arnalady. Munda jaryq kórgen ertegiler, jumbaqtar, áńgimeler, povester ómirdiń úlken qundylyqtary - qaıyrymdylyq, súıispenshilik, adamdarǵa, tabıǵatqa degen meıirimdilik bastaýlaryna úndeıdi. Qazaqstandaǵy túrli etnostardyń avtorlaryn búldirshinder men jasóspirim oqyrmandarǵa degen shynaıy yqylastary biriktiredi.

Al «Jýsan ıisti jumaq ólke» atty ekinish tomǵa qyryqtan astam kórnekti prozashylardyń shyǵarmalary engen. Olardyń sońǵy onjyldyqta jazǵan povesteri, áńgimeleri, esseleri kópultty Qazaqstannyń tarıhymen, mádenıetimen, salt-dástúrimen tanystyra otyryp, adamzat bolmysynyń máńgilik máseleleri - mahabbat pen azap, danalyq pen batyrlyq, senim men satqyndyq, jaýyzdyq pen qaıyrymdylyq taqyryptaryn arqaý etedi.

Poezııaǵa arnalǵan «Ǵasyrlarǵa jol tartqan jaqut jyrlar» dep atalatyn úshinshi tomynda seksennen astam aqyndarynyń óleń-jyrlary usynylǵan. Olardyń arasynda Qazaqstan týǵan otanyna aınalǵan basqa ult ókilderi de bar. Jınaqta tabıǵat lırıkasy, sulýlyqqa ińkárlik, mahabbat pen dostyq jyrlary keńinen qamtylǵan. Óleńderdiń kópshiligi orys tiline alǵash ret aýdarylyp otyr, dep jazady qazaq-alemi.kz.