Táýelsiz kásipodaqtar konfederatsııasynyń basshysy ashtyqty toqtatýǵa shaqyrdy
ShYMKENT. QazAqparat - Elimizde Táýelsiz kásipodaqtar konfederatsııasy óz jumysyn toqtatty. Bul týraly uıym tóraıymy Larısa Harkova málimdedi, dep habarlaıdy QazAqparat HAA tilshisi.
"Men Táýelsiz kásipodaqtar konfederatsııasynyń jetekshisi retinde bizdiń uıymnyń jumysyn toqtatý jónindegi sot sheshimin zańdy dep moıyndaımyn. Táýelsiz kásipodaqtar konfederatsııasy 2016 jyldyń aqpan aıynda tirkelgen. «Kásipodaqtar odaǵy týraly» QR Zańynyń 10 baby, 2 tarmaǵyna sáıkes, alty aıdyń ishinde, ıaǵnı 2016 jyldyń tamyzyna deıin biz Qazaqstannyń 9 óńirinde bólimsheler ashýǵa tıis edik. Alaıda, biz qajetti jaqtastarymyzdy jınaı almadyq. Soǵan qaramastan, Ádilet mınıstrligi bizge 2016 jyldyń sońyna deıin qosymsha ýaqyt berdi. Biz ony oryndaı almadyq. Sondyqtan, Ádilet organy bizdiń uıymnyń jumysyn toqtatý jóninde sotqa talap aryz berdi. Bul biz úshin zańdy",-deıdi L. Harkova.
Táýelsiz kásipodaqtar uıymy sot sheshimimen kelisti. Sonymen qatar, Larısa Harkova aldaǵy ýaqytta ketken kemshilikterdi eskere otyryp, basqa uıym qurýǵa nıetti ekenin aıtty.
Baspasóz máslıhatynda uıym jetekshisi Mańǵystaýda jarııalanǵan ashtyq aktsııasyn toqtatýǵa shaqyrdy.
«Qazirgi tańda, Aqtaý qalasynda «Oil Construction Company» JShS kásipodaq ókili Ámın Eleýsinov meniń birneshe ret aıtqan ótinishime qulaq aspaı, kerisinshe, osy kompanııanyń jumysshylaryn ashtyq jarııalaýǵa úgittep jatyr. Taǵy da resmı túrde aıtamyn, «Oil Construction Company» JShS jumysshylary ashtyq jarııalaıtyndyqtaryn menimen kelispegen, qandaı da bir qarsylyq aktsııasyn ótkizý jóninde men eshkimge, naqty aıtqanda, Eleýsinov pen Qushaqbaevqa nusqaý bergen joqpyn. Men kerisinshe, «Oil Construction Company» JShS jumysshylaryn arandatýshylyqqa ermeı, ashtyq jarııalaǵandaryn toqtatýǵa shaqyramyn,-dedi.
Almas Sultan
