Táýelsiz elimizdiń tuǵyryn bıiktetetin tulǵanyń saılanǵanyn qalaımyz - Ǵosman Tóleǵul
Onyń aıtýynsha, elimizde joǵary bıliktiń zańdy jolmen aýysqandyǵy barshaǵa aıan. Keleshektiń jaıyn tap basyp boljaıtyn Elbasy Nursultan Nazarbaev óte durys sheshim qabyldady. 2019 jyldyń 9-shy maýsymyna belgilenip otyrǵan QR Prezıdentiniń saılaýy da qazaqstandyqtardyń qamy úshin, elimizdegi beıbitshilik pen turaqtylyqty nyǵaıtý maqsatynda jasalyp jatqan ıgi isterdiń jalǵasy.
«Aqmolalyq ardagerler atynan aıtarym aldaǵy ýaqytta el ekonomıkasynyń jandanýyna, halyqtyń áleýmettik-turmystyq jaǵdaıynyń búgingiden de jaqsarýyna kóńil bólinýi kerek. Kelesi Memleket basshysynyń is-qımylynan kútetinimiz osylar. Sondaı-aq, el aqsaqaldary aýyldyń jaǵdaıyn jaqsartyp, sharýashylyǵynyń órkendeýin tileıdi», - deıdi Ǵosman Tóleǵul.
Osy oraıda ortamyzda júrgen qarııalarymyzdyń eli, halqy, keleshek urpaǵy úshin jasaǵan ıgi isteri erekshe ekenin atap ótýge bolady.
«Qazirgi kezde memleketimizde qarttarǵa erekshe kóńil aýdaryp, jan-jaqty qamqorlyq jasalýda. Qazaqstannyń ósip-órkendeýine, elimizdiń beıbit ómir keshýine óz úlesterin qosqan osy ardaqty da aıaýly qarttarymyz árqashan qurmet tuǵyrynda bolady», - dep tolyqtyrdy Ǵosman Tóleǵul.
Sonymen qatar, Aqmola oblystyq ardagerler keńesiniń tóraǵasynyń bul jolǵy Prezıdent saılaýynda da aqmolalyq qarttardyń belsendilik tanytatynyna senimi mol.
«Osy kúni oblystyq ardagerler uıymynyń quramynda 111 myńnan astam zeınetkerdi biriktiretin 843 bastaýysh ardagerler uıymy, 2 qalalyq jáne 17 aýdandyq ardagerler keńesi, 68 soǵys ardageri, myńǵa tarta soǵysqa qatysýshylarǵa teńestirilgender, 5570 tyl eńbekkeri, 900-deı Aýǵan soǵysynyń ardageri, Chernobyl atom elektr stantsııasyndaǵy apatty joıýǵa qatysqan 50-den astam adam bar. Erteń maýsymnyń 9-da olardyń barlyǵy óz saılaý ýchaskeleri boıynsha Prezıdent saılaýynda óz tańdaýyn jasaıdy. Óıtkeni, qarttarymyzdyń daýysy keleshek urpaqtyń bolashaǵy úshin mańyzdy. Eń bastysy Táýelsiz elimizdiń tuǵyryn bıiktete túsetin tulǵanyń saılanǵanyn qalaımyz», - dep túıindedi Ǵosman Tóleǵul.
