Taýdaǵy týrısterdi tonap kelgen qaraqshy ustaldy
ALMATY. QazAqparat – Almaty polıtsııasy taýǵa demalýǵa barǵan týrısterdi tonaýmen aınalysqan qaraqshyny ustady, dep habarlaıdy QazAqparat tilshisi.
Qalalyq Polıtsııa departamentiniń habarlaýynsha, Medeý aýdanynyń Býtakovka shatqalynda demalýǵa barǵan týrıster birneshe ret polıtsııaǵa aryzdanǵan. Olarǵa belgisişz bireý kelip, pyshaqpen qorqytyp, aqsha talap etken, uıaly telefondaryn tartyp alǵan.
«Aryz túsken terrıtorııalarǵa polıtsııanyń qylmystyq tergeý toby jiberildi. Olar kóp uzatpaı 37 jastaǵy adamdy ustady. Kúdikti birqatar qylmys jasaǵany úshin isti bolǵan. Ol qalada turatyn jeri bolmaǵan soń, lashyq salyp alyp, taýda tirshilik etken. Ary qaraı ózin asyraý úshin qylmysqa barǵan. Neken-saıaq júrgen adamdardy tańdap alyp, kantselıarııalyq pyshaqpen qorqytyp, aqshasyn, qundy zattaryn alyp ketip otyrǵan. Bir týrıstke pyshaq salǵan. Japa shekken adamnyń densaýlyǵyna tóngen qaýip joq. Alaıda bul onyń jazasyn aýyrlata túseri anyq», - dedi Medeý aýdandyq polıtsııa basqarmasynyń basshysy Bolat Totybaev.
Kúdiktiniń aıtýynsha, ol jalǵyz áreket etpegen. Qasynda ózinen birneshe jas úlken sybaılasy bolǵan.
«Sybaılasy jan-jaqty baqylap otyrǵan. Onyń da jeke tulǵasy anyqtaldy. Endi ustaý - ýaqyttyń enshisinde ǵana. Eń basty kúdikti ýaqytsha oqshaýlaý ornyna qamaldy. Eger osy adamnyń áreketinen japa shekken adam bolsa 254-48-00; 254-48-01 jáne 254-48-02 nómirlerine habarlasýyn suraımyz», - dedi maıor Totybaev.
