Taýdaǵy tazalyqqa jaýap beretin qus: Almaty oblysynda saqaltaı vıdeoǵa túsip qaldy

QONAEV. KAZINFORM — Sharyn memlekettik ulttyq tabıǵı park ınspektorlary Qazaqstannyń Qyzyl kitabyna engen saqaltaıdy kezdestirdi.

Qazaqstannyń Qyzyl kitabyna engen qustyń vıdeosymen Orman sharýashylyǵy jáne janýarlar dúnıesi komıteti áleýmettik jelide bólisti. 

«Sharyn memlekettik ulttyq tabıǵı parkiniń aýmaǵynda ınspektorlar reıd barysynda saqaltaıdy kezdestirdi. Ol Qazaqstannyń Qyzyl kitabyna 3-shi sanat boıynsha engizilgen. Bul jyrtqysh qustardyń eń iri túrleriniń biri, salmaǵy 6 kelige deıin jetedi, al qanattarynyń qulashy 275 sm», — dep habarlady komıtetten.

Saqaltaı — qozyqumaı, kókjóre sekildi kúndizgi jyrtqysh qustar otrıadynyń qarshyǵa tuqymdasyna jatatyn iri qus. Ol Jetisý, Jońǵar Alataýy men Tıan-Shanda, Altaıda kezdesedi. Teńiz deńgeıinen 2000-4000 metr bıiktiktegi shyń-quzdardy mekendeıdi. Uıasyn taýdyń jartasty-quzdy jerlerine salady.

Aqsý-Jabaǵyly jáne Almaty taýly qoryqtarynda 20 shaqtysy qorǵaýǵa alynǵan.

Osyǵan deıin Sharyn ulttyq park ınspektorlary «Túrkistan sileýsinin» fotoǵa túsirip alǵan edi.