Taýdaǵy qurylysqa tyıym: Almatynyń Bas josparyndaǵy ózgerister qashan bekitiledi
ALMATY. KAZINFORM — Byltyr Almatynyń damý baǵytyn aıqyndaıtyn qalanyń basty qujaty — Bas josparǵa ózgerister engizý boıynsha jumystar bastaldy.
2025 jyldyń 17 qazanynda konkýrstyq rásimderdiń qorytyndysy boıynsha Almaty qalasynyń 2040 jylǵa deıingi Bas josparyn túzetý úshin qala ákimdigi «Almatybas jospary» ǴZI» JShS-men shart jasady. Keıin jańartylǵan qujat jobasy Májilis depýtattaryna tanystyryldy. Al 2025 jyldyń 24-26 jeltoqsan aralyǵynda engiziletin ózgeristerge baılanysty qoǵamdyq talqylaýlar ótti.
Úsh aıǵa jýyq ýaqyt ótken soń, qujat aınalysynda júrgizilip jatqan jumystardyń qandaı satyǵa kelgenin anyqtap kórdik. Kazinform saýalyna jaýap bergen «Almaty bas jospary» ǵylymı-zertteý ınstıtýty Bas josparǵa túzetý Memleket basshysynyń 2025 jyldyń 4 tamyzyndaǵy tapsyrmasyna sáıkes bastalǵanyn atap ótti. Prezıdent Almatyda tabıǵatty qorǵaý sharalaryn kúsheıtýdi, qalalyq ortany teńgerimdi damytýdy jáne taý bókterlerin qurylystan qorǵaýdy tapsyrǵan bolatyn.
— Almaty qalasynyń Bas josparyn túzetýdiń negizgi mindetteri — tabıǵatty qorǵaý sharalaryn kúsheıtý, ekologııany jaqsartý, seısmıkalyq mıkroaımaqtarǵa bólýdi eskere otyryp, qalalyq ortany teńgerimdi damytý jáne taý bókterlerin qurylystan qorǵaý. Odan bólek metropolıten jelileri men jeńil relsti kólik joldaryn ózgertý. Sondaı-aq Úkimet qaýlysymen bekitilgen Alataý qalasy bas josparynyń aglomeratsııalyq aımaǵyna tıgizetin áserin naqtylaý, — dep túsindirdi ınstıtýt mamandary.
Búginge deıin memlekettik organdar men uıymdardan qajetti derekterdi jınaý, negizgi shemalardy qosa alǵanda Almaty qalasynyń bas josparyn túzetý jobasyn ázirleý, sondaı-aq megapolts aýmaǵyna tsıfrlyq topografııalyq jospar jasaý jumystary júrgizilgen. Sonymen qatar túzetilgen qala qujatyn ákimdiktiń qurylymdyq bólimshelerimen, memlekettik organdarmen jáne uıymdarmen kelisý jumystary aıaqtalǵan.
— Qazir Almaty qalasynyń topografııalyq túsirilimin Memlekettik qala qurylysy kadastrynyń avtomattandyrylǵan aqparattyq júıesinde tirkeý jumystary bastaldy. Keıin olar memlekettik saraptamaǵa jiberiledi. Odan bólek strategııalyq ekologııalyq baǵalaýdy uıymdastyrý jáne ótkizý boıynsha is-sharalar qatar júrgizilip jatyr, — dep atap ótti «Almaty bas jospary» ǴZI.
Bıyl naýryz-sáýir aılarynda strategııalyq ekologııalyq baǵalaý boıynsha qorytyndy alý josparlanǵan. Ol qanaǵattanarlyq dep tanylǵannan keıin Almaty qalasy Sáýlet jáne qala qurylysy basqarmasy qujat jobasyn taǵy da qoǵamdyq tyńdaýlarǵa shyǵarady.
Jalpy Almaty qalasynyń Bas josparyndaǵy túzetýlerdi 2026 jyldyń birinshi jartyjyldyǵynda bekitý josparlanyp otyr.
Eske salaıyq, byltyr Bas jospardaǵy ózgerister boıynsha Almatynyń jańa metro jelileriniń jobasy tanystyryldy.