Taýdaǵy apattardyń aldyn alý úshin jasóspirimderge durys baǵyt berý kerek

ASTANA. KAZINFORM — 2025 jyldyń basynan 20 tamyzǵa deıin qutqarýshylar taýly aımaqtarda 291 izdestirý-qutqarý operatsııasyn júrgizip, 396 adamdy, onyń ishinde 77 balany aman alyp qaldy. Osy kezeńde taýda 10 adam qaza tapqan.

Taýly aımaqtardaǵy qaýipsizdik máselesine qatysty tájirıbeli alpınıst, 2-dárejeli nusqaýshy Amanjol Rahmetov Jibek Joly telearnasynyń Búgin Live baǵdarlamasynda pikir bildirdi.

Mamannyń aıtýynsha, sońǵy jyldary jastar arasynda alpınızmge qyzyǵýshylyq aıtarlyqtaı artqan. Buǵan áleýmettik jelilerde taralǵan beınejazbalar áser etip otyr.

— Keı jastar arnaıy daıyndyqsyz, marshrýtty bilmeı taýǵa shyǵady. Al alpınızmde týrıstik jáne alpınıstik marshrýttar bar. Taýly aımaqtarda 1V-dan 6V-ǵa deıingi kategorııalyq shyńdar kezdesedi. Solardy bilmeý men daıyndyqtyń joqtyǵy qaıǵyly jaǵdaılarǵa ákelip jatyr, — dedi ol.

Sondaı-aq Amanjol Rahmetov áleýmettik jelilerde qaýipsizdik talaptaryn saqtamaı, arnaıy kaska men jabdyqsyz shyńǵa shyǵýdy nasıhattaıtyn vıdeolardyń kóbeıýi jasóspirimderge keri áser etetinin atap ótti. Onyń aıtýynsha, fızıkalyq jáne tehnıkalyq daıyndyq deńgeıiniń ártúrli bolýy da qaýiptiń artýyna sebep.

Maman alpınızm — sport túri ekenin jáne jastardyń oǵan qyzyǵýshylyǵy quptarlyq ekenin aıta otyryp, basty mindet olardy arnaıy sektsııalar arqyly úıretip, durys baǵyt-baǵdar berý ekenin jetkizdi.

Taýly aımaqqa shyǵar aldynda saqtalýy tıis negizgi qaýipsizdik sharalaryna da toqtaldy.

— Kóktemgi qar kóshkini kezeńinde taýǵa barmaǵan jón. Úıden shyǵar aldynda qaı marshrýtqa, kimmen jáne qansha ýaqytqa ketip bara jatqanyńyz týraly jaqyndaryńyzǵa mindetti túrde aqparat qaldyrý kerek. Aýa raıyna saı kıiný mańyzdy. Al alpınıstik marshrýttarǵa gıdsiz shyqpaý qajet, — dedi nusqaýshy.

Sonymen qatar ol taýda aýa raıynyń kúrt ózgerýi jıi kezdesetinin eskertti.

— Tuman túsken jaǵdaıda bir jerde toqtap, aýa raıynyń jaqsarýyn kútken durys. Baılanys barlyq jerde bola bermeıdi, sondyqtan qaı jerde baılanys ustaıtynyn aldyn ala bilý kerek. Qutqarý qyzmetiniń nómiri mindetti túrde bolýy tıis, — dep túıindedi Amanjol Rahmetov.

Eske salsaq, Almaty taýlarynda joǵalyp ketken qyzdyń máıiti tabyldy.

Sonymen qatar, qutqarýshylar teńiz deńgeıinen shamamen 3 700 metr bıiktikte ornalasqan «Lokomotıv» shyńy mańynan eki adamnyń máıitin tapty.