Taýda joǵalǵan eki týrısti izdeýge Ózbekstan qutqarýshylary da jumyldyryldy
TÚRKІSTAN. QazAqparat - Túrkistan oblysy Tólebı aýdanynda taýda joǵalǵan eki týrısti izdeýge ózbekstandyq qutqarýshylar da jumyldyryldy. Bul týraly óńirdiń TJD bastyǵynyń orynbasary Erik Sarybaev málimdedi, dep habarlaıdy QazAqparat tilshisi.
Erik Sarybaevtyń aıtýynsha, kórshi eldiń qutqarýshylary izdeý sharalaryn kesheden bastap júrgizip jatyr.
«Іzdeý sharalary bastalǵaly beri 350 shaqyrymnan asa aýmaq jaıaý aralandy. Sonymen qatar ushqyshsyz ushý apparattaryn paıdalaný arqyly 170 shaqyrymǵa jýyq aýmaq zertteldi. «QazAvıaqutqarý» AQ eki tikushaǵy arqyly 3400 shaqyrym aýmaqqa áýeden baqylaý júrgizildi. Qazirgi tańda izdeý jumysyna TJD, polıtsııa, UQK Shekara qyzmetiniń shekarashylary, ulttyq park qyzmetkerleri jumyldyrylǵan. Ózara is-qımyl josparyna sáıkes, kesheden bastap Ózbekstan Respýblıkasy, Tashkent oblysy, TJ bas basqarmasynyń qyzmetkerleri de óz aýmaqtarynda kirisip otyr. Іzdestirý jumystary áli jalǵasatyn bolady»,- dedi Erik Sarybaev.
Eske salaıyq, Tólebı aýdanynyń Saıram-Ógem memlekettik ulttyq tabıǵı parkiniń aýmaǵynda 7 adamnyń joǵalǵany týraly habarlama 25 mamyrda túsken bolatyn.
Onyń úsheýi aman-esen tabylyp, úıine qaıtaryldy. Al, 29 mamyr kúni saǵat 00:30-da úzdiksiz izdestirý jumystarynyń barysynda Ógem ózeninen bir adamnyń jansyz denesi tabyldy.
Ol 1999 jyly týǵan taýda joǵalyp ketken týrıster tobynyń biri ekeni anyqtaldy. Ekinshi jigittiń denesi Ógem ózeninen 3 shaqyrym jerden tabylǵan.
Qalǵan eki adamdy izdestirý jumystary jalǵasýda. Jerdegi izdestirýdi qutqarýshylar, polıtsııa qyzmetkerleri, shekara qyzmetiniń at patrýli, ulttyq park qyzmetkerleri jáne joǵalǵandardyń týystary júrgizýde.
Sondaı-aq, áýeden izdeý úshin QR TJM «Qazavıaqutqarý» AQ eki borty jumys istep jatyr.
Atalǵan fakti boıynsha Túrkistan oblysynyń polıtsııa departamenti sotqa deıingi tergeýdi bastady.
Saraptama taǵaıyndaldy, olardyń nátıjesi boıynsha ólimniń sebebi anyqtalady.
Eske sala keteıik, biz osyǵan deıin Túrkistan oblysynda 7 adamnyń joǵalyp ketkenin jazǵan edik.
Sondaı-aq izdeý jumysyna tikushaq jumyldyrylǵany aıtyldy.
Keıinnen joǵalǵan jeti týrıstiń úsheýi aman tabylǵan bolatyn. Eki kúnnen keıin taǵy eki stýdenttiń denesi tabyldy.
