Taýda demalyp jatqan dárigerler jaraqattanǵan adamdardy qutqardy
ALMATY. QazAqparat - Almatyda taýǵa demalysqa shyqqan eki adam jaraqat aldy. Abyroı bolǵanda olarǵa jaqyn arada demalyp jatqan dárigerler kómekke kelgen, dep habarlaıdy QazAqparat tilshisi.
Oqys oqıǵa týraly Feısbýkte Almaty turǵyny Gýlzııa Býrshýkova jazǵan bolatyn.
Onyń aıtýynsha, demalýǵa kelgen áıelderdiń biri dop soǵam dep júrip, qolyn jaralap alǵan.
Sonymen qatar, taǵy bir qala turǵyny velosıpedimen aryqqa qulap ketken. Sonyń saldarynan er adamnyń aıaǵynan qan toqtamady. Sol sátte, jaqyn arada demalyp jatqan dárigerler óz sharýalaryn tastaı salyp, eki adamǵa lezde kásibı túrde medıtsınalyq kómek kórsetken.
«Biz olardan kómek suraǵan kezde olar tek «qaıda?» dep surady. Biri chemodanyn alyp, ekinshisi onyń artynan erip otyrdy. Qaı kezde de kásibı daıarlyqty kórsetý degen osy emes pe? Olardyń merekeleri kóńildi ótti. Sebebi olar adam ómirin qutqaryp qaldy. Dáriger úshin eń bastysy osy emes pe?!», - dedi ol.
Almaty turǵyny jazbasynyń sońynda aq halatty abzal jandarǵa alǵysyn bildirdi.
Osyǵan oraı qalalyq Jedel járdem stansasynyń baspasóz qyzmeti bolǵan oqıǵa týraly túsinikteme berdi.
«Sol kúni Almaty qalalyq Jedel járdem stansasy №5 bólimshesiniń dárigerleri men feldsherleri Medıtsına qyzmetkerleri kúni qarsańynda taýǵa demalysqa shyqqan. Olar únemi alǵashqy kómek kórsetý quraldaryn, medıkamentterdi ózderimen birge alyp júredi. Sonyń arqasynda eki adamǵa qajetti kómek kórsete aldy», - dedi Jedel járdem stansasynyń baspasóz hatshysy Gaýhar Nókerbekova.
