Taýarlyq gazdy satyp alý men ótkizýde operatordyń aıryqsha quqyǵy joıylmaq

NUR-SULTAN. QazAqparat – QR Básekelestikti qorǵaý jáne damytý agenttigi tóraǵasynyń birinshi orynbasary Rýstam Ahmetov taýarlyq gaz naryqtaryndaǵy básekelestikti damytý qadamdaryn atady, dep habarlaıdy QazAqparat tilshisi.

«Taýarlyq gaz naryqtaryndaǵy básekelestikti damytýda ne usynylady? Gaz baǵasyn memlekettik retteýdi saqtaý. Bul rette, osyndaı kvotalardy qalyptastyrýdyń aıqyn jáne ashyq ólshemsharttaryn aıqyndaı otyryp, ishki naryqqa gaz jetkizýdi kvotalaý tetigin engizý qajet. Bul naryqty kezeń-kezeńimen qaıta retteý taýarlyq gazdy bırjada ótkizý kólemin ulǵaıtý arqyly júzege asyrylatyn bolady. Bul ınvestıtsııalar tartý jáne týyndaǵan tapshylyq jaǵdaıynda gaz óndirý kólemin ulǵaıtý úshin qajet», - dedi R. Ahmetov Ortalyq kommýnıkatsııalar qyzmetinde.

Onyń aıtýynsha, taýarlyq gazdy satyp alýǵa jáne ony ishki naryqqa ótkizýge «QazaqGaz» aıryqsha quqyǵyn joıý kerek.

«Osylaısha, táýelsiz bólshek saýdada gaz jetkizýshilerge taýarlyq gazdy magıstraldyq jáne taratý jelileri arqyly tikeleı ótkizý tetigi usynylady. Bul baǵa belgileýden ulttyq operatordyń, gazdy biryńǵaı satyp alýshynyń joǵaryda atalǵan monopolııalyq shyǵyndaryn alyp tastaýǵa, onyń básekeles aralas taýar naryqtaryna – qurylys-montajdaý jumystaryna, bıllıngke, kólikke teris áserin joıýǵa múmkindik beredi. Ulttyq operatordyń eksporttyq kiristerinen ishki naryqty sýbsıdııalaý toqtatylǵannan keıin, 2025 jylǵa qaraı osy taýar naryǵyn monopolııasyzdandyrýdy aıaqtaý usynylady», - dedi agenttik ókili.

Budan buryn habarlanǵandaı, Básekelestikti qorǵaý agenttigi basshylyǵy gaz naryǵyndaǵy kemshilikterdi atady.

Rýstam Ahmetov taýarlyq gazdy bólshek saýdada ótkizý naryǵynda monopolııasyzdandyrý protsesi bastalǵanyn aıtty.