Taýarly gazdy ishki naryqta kóterme saýdada ótkizýdiń jańa shekti baǵasy bekitildi
«Respýblıkany ishki gazben qamtý júzege asyrylatyn negizgi magıstraldar belgilengen resýrstaryn ótedi jáne dıagnostıkalyq tekseristerdiń nátıjesi boıynsha olardyń tozý deńgeıi joǵary. Energetıkalyq qaýipsizdikti qamtamasyz etýde tek óńirler bólinisinde ǵana emes, el aýqymynda da strategııalyq mańyzdy gaz ınfraqurylymynyń 70% paıdalaný merzimi 40 jyldan asady», - dep habarlaıdy QR EM baspasóz qyzmetinen.
QR zańnamasyna sáıkes taýarly gazdyń kóterme saýda baǵasyn memlekettik retteýdi Energetıka mınıstrligi, al bólshek saýda baǵasyn memlekettik retteýdi Ulttyq ekonomıka mınıstrligi júzege asyrady.
Іshki naryqta gazdyń sońǵy baǵasyn ustap turý úshin «QazTransGaz» AQ jyl saıyn eldiń ishki naryǵyn eksport esebinen sýbsıdııalaıdy.
2015-2020 jyldar aralyǵynda Ulttyq operatordyń ishki naryqty sýbsıdııalaýdan shekken shyǵyndar somasy shamamen 425 mlrd teńgeni qurady.
Taýarly gazdy kóterme saýdada ótkizýdiń shekti baǵalary sońǵy ret 2019 jylǵy 1 qańtarda túzetilgen bolatyn. Ol kezde baǵalar óńirge baılanysty 3,8%-dan 17,5%-ǵa deıin tómendetildi jáne osy ýaqytqa deıin kóterilgen joq.
«Qazirgi ýaqytta ishki naryqta bekitilgen taýarly gazdyń shekti kóterme saýda baǵalary jetkiziletin gazdyń ózindik qunynan tómen. Ártúrli oblystarda bekitilgen kóterme saýda baǵalary ózindik qunynan 1,5-nan 2,5 esege deıin tómen.
Osyǵan baılanysty, taýarly gazdy kóterme saýdada ótkizýdiń shekti baǵalaryn qazirgi deńgeıde bekitken jaǵdaıda Ulttyq operatordyń shyǵyndary ulǵaıar edi. Al ınvestıtsııalyq baǵdarlamalardyń oryndalmaýy aqyr sońynda gaz qubyrlarynyń shektik aqaýlar sanynyń artýyna ákep soǵady, bul elimizge orny tolmas nuqsan keltireri sózsiz.
Joǵaryda baıandalǵandy eskere otyryp, Qazaqstan Respýblıkasynyń ishki naryǵynda taýarly gazdy kóterme saýdada ótkizýdiń 2021 jylǵy 1 shildeden bastap 2022 jylǵy 30 maýsymdy qosa alǵan kezeńge arnalǵan shekti baǵalary bekitildi. Osy buıryqqa sáıkes taýarly gazdy kóterme saýdada ótkizýdiń shekti baǵalary óńirge baılanysty orta eseppen 11% kóterildi», - dedi mınıstrlikten.
