Taýarlyq gazǵa arnalǵan «áleýmettik ámııan» gazdandyrylǵan óńirlerdiń bárine taratylady
ASTANA. KAZINFORM — Energetıka mınıstri Erlan Aqkenjenov Úkimet otyrysynda taýarlyq gazǵa arnalǵan «áleýmettik ámııan» jobasy gazdandyrylǵan óńirlerdiń bárine taratylatynyn málim etti.
— Batys Qazaqstan oblysy men Shymkent qalasynda memlekettik ataýly áleýmettik jáne turǵyn úı kómegin alýshylarǵa taýarlyq gazǵa vaýcherler usyný qyzmetin kórsetý úshin «áleýmettik ámııan» pılottyq tsıfrlyq jobasy engizildi. Bul joba taýarlyq gaz baǵasynyń ósýi jaǵdaıynda halyqtyń osal toptaryn qoldaýǵa baǵyttalǵan. Pılottyq joba iske qosylǵan sátten bastap bul qyzmetti 9,4 myń abonent paıdalandy. 24%-ǵa deıingi jeńildikpen, 23,5 mln teńgege 2,9 mln tekshe metr gazdy tutynyldy. Osy kómekke joǵary suranys bar ekenin eskersek, ony el boıynsha odan ári masshtabtaý qajet. Bul pılottyq joba 2025 jyldyń sáýir aıynyń sońynda aıaqtalady. Osyǵan baılanysty pılottyq jobanyń merzimin 30 maýsymǵa deıin uzartý, keıinnen elimizdiń barlyq gazdandyrylǵan óńirlerine 1 jyl merzimge masshtabtaý týraly másele pysyqtalýda, — dedi Erlan Aqkenjenov.
Sondaı-aq, mınıstr taýarlyq gazdy ishki naryqtaǵy shekti kóterme baǵasy 5 jyl merzimge bekitiletinin aıtty.
— Búgingi tańda halyqqa 1 myń tekshe metr gaz ótkizý úshin taýarlyq gazdyń ortasha shekti kóterme baǵasy tekshe metrine 23 646 teńge mólsherinde. Ulttyq operator 10 096 teńgesin sýbsıdııalaıdy, — dedi ol.
Eske salsaq, Prezıdent Qasym-Jomart Toqaev Jańaózen gaz óńdeý zaýyty qurylysynyń keshigýin Úkimettiń óreskel olqylyǵy retinde baǵalaǵan edi.
Osyǵan deıin Premer-mınıstr Oljas Bektenov QazaqGaz ulttyq kompanııasynyń basqarma tóraǵasy Sanjar Járkeshevke saladaǵy problemalardy ashyp aıtpaǵany úshin eskertý jasady.
Sonymen qatar Qazaqstan 3 aıda 17,2 mlrd tekshe metr gaz óndirgeni belgili boldy.
Qazir QazaqGaz 535,5 mlrd tekshe metr gaz qory bar 15 ýchaskeni barlap jatyr.