Taýarlyq gazdyń qymbattaýy halyqtyń qaltasyna salmaq salmaı ma
ASTANA. KAZINFORM – Energetıka mınıstrligi taýarlyq gazdyń kóterme shekti baǵasynyń jańadan bekitilýine qatysty jaıtty túsindirdi.
Energetıka mınıstrliginiń Gaz ónerkásibi departamenti Gaz óndirý, óńdeý jáne tasymaldaý basqarmasynyń basshysy Dáýlet Eshtaıdyń aıtýynsha, kógildir otyn quny 1 shildeden bastap ortasha eseppen 14,6 paıyzǵa kóteriledi. ıAǵnı, óńirlerge baılanysty gazdyń 1 tekshe metri 3-4,8 myń teńge aralyǵynda qymbattaıdy. Óıtkeni, kóterme baǵa kógildir otyndy belgili bir óńirge jetkizý kezinde qalyptasatyn ózindik qunǵa baılanysty. Al ol baǵa jer qoınaýynan gazdy óndiretin kompanııadan kógildir otyndy satyp alý jáne logıstıkalyq shyǵyndardan quralady. Munyń ústine sońǵy jyldary taýarlyq gazdyń eksport kólemi de kúrt tómendep ketken. Gaz salasynyń ınvestıtsııalyq tartymdylyǵy da tómendep barady. Oǵan dál osy kóterme shekti baǵa keri áserin tıgizip otyr.
«Sebebi sońǵy jyldarda Qazaqstanda taýarlyq gaz óndirisi tómendep keledi. 2017-2018 jyldarmen salystyrǵanda taýarlyq gaz óndirisi shamamen 2,5-3 mlrd tekshe metrge tómendegen. Onyń negizgi sebebi – ishki naryqtaǵy gaz baǵasynyń tómendigi. Jer qoınaýyn paıdalanýshylar men ınvestorlar gaz baǵasy tómen bolǵandyqtan ken oryndaryn ıgerýge ınvestıtsııa salýǵa kelgende qulyqsyz. Sondyqtan da gaz salasynyń ınvestıtsııalyq tartymdylyǵyn baǵany kóterý arqyly yntalantyratyn sharalardy qabyldaýymyz qajet», - dedi ol.
Búginde elimizde gazdandyrý qarqyndy júrgizilip, kógildir otynnyń qyzyǵyn kórgen jurtshylyqtyń qarasy qalyńdady. Onyń ústine gazdyń baǵasy da arzan. Máselen, kórshi Reseıde gazdyń 1 tekshe metri 30 teńgeden assa, elimizdegi ortasha baǵa 20,64 teńgeni quraıdy. Degenmen, Energetıka mınıstrliginiń ókili gazdyń kóterme shekti baǵasynyń kóterilýi qarapaıym halyqtyń qaltasyna aýyr salmaq sala qoımaıtyndyǵyn alǵa tartady.
«Orta eseppen alar bolsaq, jeke úılerge aıyna 1 080 teńgege ósse, al páterler 130 teńge artyq tólem jasaıtyn bolady. Bul halyqtyń qaltasyna qatty áser ete qoımaýy qajet», - dedi Dáýlet Eshtaı.
Esterińizge sala ketsek, búgin elimizdiń Energetıka mınıstrligi taýarlyq gazdyń kóterme shekti baǵasyn 1 shildeden bastap qymbattatylǵan baǵamen bekitken edi.
