Taýarlyq gazdy tıimsiz paıdalaný energetıkalyq jáne ekonomıkalyq táýekelderge ákelýi múmkin - Jańbyrshın
ASTANA. KAZINFORM — Taýarlyq gazdy tıimsiz paıdalaný energetıkalyq jáne ekonomıkalyq táýekelderge ákelýi múmkin. Bul týraly Májilistiń jalpy otyrysynda depýtat Edil Jańbyrshın aıtty.
- Búgingi tańda gaz salasy Qazaqstan úshin bir mezgilde úsh mańyzdy mindetti atqaryp otyr. Birinshiden, taýarlyq gaz — shekteýli ári strategııalyq resýrs, ony tıimsiz paıdalaný bolashaqta energetıkalyq jáne ekonomıkalyq táýekelderge ákelýi múmkin. Búgingi tańda elimizde gazdyń resýrstyq bazasy shamamen 3,8 trln tekshe metrdi quraıdy. al jyldyq óndirý kólemi 60 mlrd tekshe metrdiń aınalasynda, - dedi Edil Jańbyrshın gazben jabdyqtaý jáne gazdy únemdi tutyný máseleleri boıynsha zań jobasyn tanystyra kele.
Onyń aıtýynsha, ekinshiden, elimizde gaz kómirge qaraǵanda ekologııalyq turǵydan anaǵurlym taza energııa kózi retinde klımattyq kún tártibindegi mindetterdi oryndaýda mańyzdy ról atqarady.
- Úshinshiden, bul — eldi gazdandyrý arqyly azamattardyń ómir súrý sapasyn arttyrý jáne óńirler arasyndaǵy áleýmettik teńgerimdi qamtamasyz etý quraly. Gazdyń jyldyq óndirý kórsetkishter syrttaı jetkilikti kóringenimen, búgingi kúni memlekettiń ishki tutyný kólemi 21,6 mlrd tekshe metrge jetti. Qazirgi tańda elimizdi gazdandyrý deńgeıi 64,2 paıyzdy qurap otyr, - dedi ol.
Májilis depýtatynyń aıtýynsha, sońǵy jyldary elimizde gaz tutyný kólemi qarqyndy ósip keledi. Bul úrdis, bir jaǵynan, gazdandyrý saıasatynyń nátıjesi bolsa, ekinshi jaǵynan taýarlyq gazdy únemdi jáne jaýapty paıdalaný máselesin kún tártibine ótkir qoıyp otyr.
- Memleket basshysy atap ótkendeı, energııa resýrstarynyń qoljetimdiligi olardy beı-bereket tutynýǵa negiz bolmaýy tıis. Kerisinshe, dál osy kezeńde energııa tıimdiligi men únemshildik qaǵıdattary memlekettik saıasattyń ajyramas bóligine aınalýy qajet. Osyǵan baılanysty Májilis depýtattary «Qazaqstan Respýblıkasynyń keıbir zańnamalyq aktilerine gazben jabdyqtaý jáne gazdy únemdi tutyný máseleleri boıynsha ózgerister men tolyqtyrýlar engizý týraly» zań jobasyna bastamashy boldy. Atalǵan zań jobasy gaz salasyndaǵy jınaqtalǵan júıelik teńgerimsizdikterdi joıýǵa, retteýdiń tıimdiligin arttyrýǵa jáne eldiń energetıkalyq turaqtylyǵyn qamtamasyz etýge baǵyttalǵan, - dedi Edil Jańbyrshın.
Aıta keteıik, taýarlyq gazdy únemdep paıdalaný mádenıetin qalyptastyrýǵa, sondaı-aq jeke jáne kommýnaldyq tutynýshylar úshin saralanǵan tarıf saıasatyn qurýǵa baǵyttalǵan zań jobasyna qatysty Edil Jańbyrshın Kazinform tilshisine suhbat bergen edi.
