Taýarlyq gaz óndirý 32,3 mlrd tekshe metrge deıin artady
ASTANA. KAZINFORM – Búgin Úkimet otyrysynda Energetıka vıtse-mınıstri Qaıyrhan Tutqyshbaev gaz óńdeý zaýyttarynyń jobasyna qatysty túsinik berdi.
- Memleket basshysynyń gaz óńdeý qýatyn arttyrý jónindegi tapsyrmasyn iske asyrý aıasynda Qashaǵan ken ornynda eki gaz óńdeý zaýytyn salý boıynsha strategııalyq jobalar júzege asyp jatyr. Bul jobalardy júzege asyrý elimizdiń energetıkalyq qaýipsizdigin nyǵaıtyp, jyl saıyn shamamen 2,5 mlrd tekshe metr taýarlyq gazdy, shamamen 400 myń tonna suıytylǵan munaı gazyn, 17 myń tonna kompozıtti turaqty gaz ónimin, shamamen 760 myń tonna túıirshiktelgen kúkirtti óndirýge múmkindik beredi, - dedi Q. Tutqyshbaev.
Onyń aıtýynsha, qýattylyǵy jylyna 1 mlrd tekshe metr Gaz óńdeý zaýyty jobasy aıasynda qurylys alańyna shamamen 1 500 adam jáne 300-den astam tehnıka jumyldyrylǵan. Jalpy jetkizilý kóleminiń 95%-yn quraıtyn 900-den astam jabdyq jetkizildi. Nysanda negizgi konstrýktsııalardyń qurylysyn, jabdyqtardy montajdaý jáne kommýnaldyq ınfraqurylymdy júrgizý sııaqty is-sharalardy qamtıtyn birqatar keshendi qurylys jáne tehnologııalyq jumystar júrgizilip jatyr, qajetti synaqtar kezeń-kezeńimen ótkizildi.
- Sonymen qatar, búgingi kúni irgetastardy, metall konstrýktsııalaryn, mehanıkalyq jabdyqtardy, rezervýarlardy jáne jer asty qubyrlaryn ornatý boıynsha beton quıý jumystary jalǵasyp jatyr. Qurylys-montajdyq jumystardyń jalpy barysy 30%-dan astam, al EPC jalpy barysy 55%-dy quraıdy. Barlyq qurylys ári mehanıkalyq jumystardyń aıaqtalýy jáne nysandy paıdalanýǵa berý 2026 jyldyń sońyna josparlanǵan, - dedi vıtse-mınıstr.
Budan bólek, qýattylyǵy jylyna 2,5 mlrd tekshe metr Gaz óńdeý zaýyty jobasy úshin pre-FEED kezeńi 100% aıaqtaldy. Qazirgi ýaqytta jobanyń kelisimshart strategııasyna qatysty tásilder Katarlyq seriktes UCC Holding kompanııasymen ázirlenip jatyr.
- Osylaısha, joǵaryda kórsetilgen gaz óńdeý qýattaryn engizýdi eskere otyryp, taýarlyq gaz óndirý 2032 jylǵa qaraı jylyna 32,3 mlrd tekshe metrge deıin artady, - dedi ol.
Buǵan deıin tórtinshi munaı óńdeý zaýyty naqty salynatyny málim boldy.