Taýarlyq bırja basshylyǵy kómirdi zańsyz satýdan 2 mlrd teńge paıda tapqan - QMA
ASTANA. KAZINFORM – Qarjylyq monıtorıng agenttigi «Modern Trading Solutions» taýarlyq bırjasynyń zańsyz qyzmetin toqtatty.
Atalǵan uıym basshylyǵy bırjalyq saýdanyń negizgi qaǵıdalaryn buzyp, Shubarkól ken ornynan kómirdi tek zańsyz materıaldyq syıaqy tólegen tulǵalarǵa satqan.
Kómirdi qoldanystaǵy zańnamaǵa sáıkes, saýdager saýda bırjalary arqyly básekelestikti damytýǵa, deldaldarsyz, onyń ádil baǵasyn qalyptastyrýǵa yqpal jasaýǵa tıis bolatyn.
Sonymen qatar, «Modern Trading Solutions» taýar bırjasynyń basshylyǵy 23 brokerlik kompanııany týystary men senimdi tulǵalarynyń atyna tirkep, ózderiniń jumysyn kómir saýdasyna tek udaıy aqshalaı syıaqy beretin adamdardy jiberetindeı etip uıymdastyrǵan.
Keri jaǵdaıda, akkredıtatsııa merzimin sozyp, kelisimshartqa qol qoımaý, saýdaǵa qoljetimdiligin shekteý jáne olardyń nátıjelerin joıý arqyly kásipkerlerge saýdaǵa qatysýyna jol bermegen.
Atalmysh jaǵdaı ásirese jylytý maýsymy aldynda kóptegen aryz-shaǵymdar men áleýmettik shıeleniske ákelip soqtyrǵan.
Qylmystyq toptyń jyl saıynǵy kirisi 2 mıllıard teńgeden asqan. Ony ózderine qarasty kompanııalar arqyly qolma-qol aqshaǵa aınaldyryp otyrǵan.
Saýda bırjasynyń 3 basshysyna qamaýǵa alý túrindegi bultartpaý sharasy tańdaldy, al taǵy bireýine osyndaı sharamen qatar izdeý jarııalandy.
QR Qylmystyq protsestik kodeksiniń 201-babyna sáıkes basqa aqparat jarııa etýge jatpaıdy.
Agenttik áleýmettik mańyzdy taýarlarǵa baǵa qalyptastyrýdy baqylaýdy jalǵastyrýda. Bırjalyq mámilelerde ádil jaǵdaılardy qalpyna keltirýde jáne tutynýshylardyń múddelerin qorǵaýda jumys isteýde.
- Eger Sizge ekonomıkalyq quqyq buzýshylyq jasaý faktileri belgili bolsa, bul týraly «AFM Insider» telegram botyna habarlaýyńyzdy suraımyz. Anonımdilikke kepildik beriledi, - delingen habarlamada.
Osyǵan deıin Qarjylyq monıtorıng agenttiginiń bıyl 34 jobadan 79 mlrd teńge artyq shyǵyndy qysqartqany ýraly jazǵan bolatynbyz.