«Taýarly nesıe» baǵdarlamasyn qabyldaý qajet - Saırov

ASTANA. KAZINFORM – «Taýarly nesıe» baǵdarlamasyn qabyldap, iske asyrý qajet. Bul týraly Premer-Mınıstrdiń orynbasary Serik Jumanǵarınge saýal joldaǵan Májilis depýtaty Erlan Saırov aıtty.

- Bizge shekaralyq aýdandardan aýyl sharýashylyǵyn qoldaý, damytý máseleleri boıynsha azamattar jıi habarlasady. ShQO, Abaı, Jetisý oblystarynyń shekaralyq aýdandardyń fermerleri Prezıdent Qasym-Jomart Toqaev tapsyrma bergen aýyl sharýashylyǵyna «taýar nesıesi» jóninde ótinish bildirdi. Búgingi kúni Úkimet Memleket basshysynyń Joldaýynda aıtylǵan «Taýarly nesıe» týraly baǵdarlama ázirlemegen, - dedi depýtat.

Osy oraıda ol aýyl sharýashylyǵyn nesıeleýge qatysty tómendegideı problemalardy atady:

- paıyzdyq ústemesi men tólem kestesiniń qolaılyǵynan basqa kóptegen jasyryn talaptardyń bolýy;

- kepilge qoıylatyn talaptardyń joǵarylyǵy (aýyldaǵy úılermen qora-qopsylardyń kepilge alynbaýy nemese tómen baǵalanýy);

- memleket tarapynan sýbsıdııalanatyn paıyzdyq ústemelerdiń bıýdjet tapshylyǵyna baılanysty sharýalardyń ózderine tólettirilýi;

- Aıtalyq, elimizdegi ekinshi deńgeıli bankter úshin nesıe berý bul tabys kózi bolsa, memlekettiń beretin jeńildetilgen nesıeleriniń negizgi maqsaty - bul belgili bir salanyń damýyna, aıaǵynan turýyna yqpal etý. Úkimet ekonomıkanyń naqty sektoryn aýqymdy qarjylandyrýǵa kirisetindigi týraly jarııalady. 2025 jyly «Damý» qory 1,7 trln teńgeni quraıtyn ShOB-tyń keminde 30 myń jobasyna qoldaý kórsetetindigin aıtqanymen naqty qarjylandyrý baǵdarlamalary aıqyndalmaǵan. «AMANAT» fraktsııasy bul baǵdarlamalar shekaralyq aýdandar fermerlerine de qoljetimdi bolýy qajet dep esepteıdi. Úkimet damý ınstıtýttarynyń qarjylandyrý kózderin shekaralyq aýdandardyń fermerlerine qol jetimdiligin qamtamasyz etýi qajet. Bul - 3,4 mln adam turatyn 65 aýdannyń halqynyń taǵdyry, - dedi Erlan Saırov.

Sondyqtan depýtat Memleket basshysy Qasym-Jomart Toqaevtyń tapsyrmasyn júıeli iske asyrý, aýyl ekonomıkasyna baǵyttalatyn shaǵyn nesıeler kólemi men sanyn, qoljetimdiligin ulǵaıtý maqsatynda «Taýarly nesıe» baǵdarlamasyn qabyldaý, iske asyrý qajet dep sanaıdy.

Memleket basshysy Qasym-Jomart Toqaev «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Joldaýynda «Aýyl amanaty» jobasy aıasynda taǵy bir jańa tásildi, ıaǵnı «taýar nesıesin» berý máselesin qarastyrý qajettigin aıtqan edi.