Taýarlardyń biraz bóligi baqylaýdan tys qalyp otyr - mınıstr
ASTANA. QazAqparat - Búginde taýarlardyń sapasy men qaýipsizdigine qatysty naqty texnıkalyq reglamentter bar. Alaıda osy saladaǵy baqylaý sharalary durys júrgizilmeıdi, dep xabarlaıdy QazAqparat tilshisi.
QR Investıtsııalar jáne damý mınıstri Jeńis Qasymbektiń aıtýynsha, taldaý nátıjesi mańyzdy bir máseleni kórsetti. Búginde 78 texnıkalyq reglamenttiń ishinde tek 54-i boıynsha memlekettik baqylaý sharalary júrgiziledi. Bul degenimiz, taýarlardyń biraz bóligi baqylaýdan tys qalyp otyr.
«Sonda bizde barlyq texnıkalyq reglamentterdiń 69 protsenti ǵana tekseriledi. 7 reglament, ıaǵnı 8 protsenti jartylaı baqylanady. Al 17 reglament boıynsha tekserister múldem atqarylmaıdy. Bul barlyq talaptardyń - 21 protsenti», - dedi J.Qasymbek Úkimettiń búgingi otyrysynda.
Mınıstrdiń sózine qaraǵanda, qazirgi kezde osy salany rettep, árbir memlekettik organǵa naqty reglamentti baqylaý fýnktsııasyn tapsyrý máselesi zerdelenip jatyr. Máselen, QR Aýyl sharýashylyǵy mınıstrligi aýyz sýdan basqa tamaq ónimderiniń bárin baqylaýǵa alýǵa daıyn. Balalarǵa arnalǵan tamaq ónimderin de atalǵan mekemege berý kózdelip otyr.
«QR Densaýlyq saqtaý mınıstrligi texnıkalyq reglamentterde kórsetilgen sanıtarlyq, epıdemıologııalyq jáne gıgıenalyq talaptardy baqylaýdy júrgize beredi degen usynys bar. Sonyń ishinde oıynshyqtar, parfıýmerııalyq taýarlar jáne taǵy basqa ónimder bar. QR Investıtsııalar jáne damý mınıstrligi bolsa, ónerkásip taýarlaryn baqylaý mindetin atqarady. Alaıda birqatar máselelerdi áli de talqylaý qajet. Sebebi aýyl sharýashylyǵy mınıstrligi men densaýlyq saqtaý mınıstrligi bir sheshimge kele almaı otyr. Jaqyn arada biz Úkimettiń qaraýyna naqty qujatty engizetin bolamyz», - dep atap kórsetti J.Qasymbek.
Aıta keteıik, búgingi otyrysta tamaq ónimderiniń qaýipsizdigin baqylaý salasynda biryńǵaı organdy belgileý máselesi qaraldy. Aýyl sharýashylyǵy mınıstrligi atalǵan mindetti tolyǵymen ózine júkteýdi surap otyr. Al Premer-Mınıstr Baqytjan Saǵyntaev tárkilengen taýarlardyń joıylatynyna kúdiktendi. Sondaı-aq, Úkimet basshysy «Baqylaý sharalaryn bir organǵa tapsyrýǵa bola ma?» degen suraqqa jaýap berdi.
