Taýarlardy terrorısterdiń paıdalanýyna jol bermeý úshin EýrAzEQ aıasyndaǵy kelisiminiń kúshi joıylady - Májilis
ASTANA. QazAqparat - Búgin Parlament Májilisiniń tóraǵasy Nurlan Nyǵmatýlınniń jetekshiligimen ótken palatanyń jalpy otyrysynda «Eýrazııa ekonomıkalyq qoǵamdastyǵyna múshe memleketterdiń eksporttyq baqylaýynyń biryńǵaı tártibi týraly kelisiminiń kúshin joıý týraly» zań jobasy maquldandy.
Kelisimniń kúshin joıý qajettiligi qosarlanǵan maqsattaǵy taýarlardyń EýrAzEQ-qa múshe memleketterdiń aýmaǵy arqyly qozǵalysy kezinde transshekaralyq baqylaýdyń bolmaýynan týyndap otyr. Al mundaı baqylaýdyń bolmaýy ulttyq qaýipsizdikke qater tóndirýi múmkin ekenine jáne ondaı taýarlardy terrorıstik áreketterge paıdalaný múmkindigi turǵysynan qaýipti bolatynyna nazar aýdarylady. Sonymen qatar, kelisimniń kúshi qarý-jaraq pen áskerı tehnıkaǵa, sondaı-aq áskerı maqsattaǵy ózge de ónimderge qatysty syrtqy ekonomıkalyq qyzmetterge qoldanylmaıtyn bolady. «Aıta keterligi, bul kelisim Keden Odaǵy qurylmaı turyp qabyldanǵan bolatyn ári búgingi kúni is júzinde jumys istemeıdi. Sonymen qatar, eksporttyq baqylaýǵa jatatyn taýarlardy terrorısterdiń jappaı qyryp-joıý qarý-jaraqtaryn, qarapaıym qarýlardy daıyndaý úshin paıdalaný múmkindigin eskersek, qujattyń kúshin joıý mańyzdy. Álemde terrorıstik jáne ekstremıstik áreketterdiń ózektiligine baılanysty taýarlardyń baqylaýsyz Qazaqstan aýmaǵyna ótip ketpeýin qamtamasyz etý bizdiń ulttyq qaýipsizdigimiz turǵysynan da asa ózekti», - dedi zań jobasy boıynsha baıandaǵan Indýstrııa jáne jańa tehnologııalar vıtse-mınıstri Albert Raý. Onyń sózine qaraǵanda, búgingi tańda Keden Odaǵy memleketteriniń aıasynda kelisimsharttyq quqyqtyq bazalar qalyptastyrý negizinde taýarlardyń eksporttyq baqylaýyna arnalǵan qujattar ázirlenip jatyr.
