Taýarlardy tańbalaý kezinde áleýmettik mańyzdaǵy ónimder quny óspeıdi
ASTANA. QazAqparat - Senatta «Eýrazııalyq ekonomıkalyq odaqta taýarlardy sáıkestendirý quraldarymen tańbalaý týraly kelisimdi ratıfıkatsııalaý týraly» zań jobasy qaraldy, dep habarlaıdy QazAqparat.
Kelisimge 2018 jylǵy 2 aqpanda Eýrazııalyq úkimetaralyq keńestiń otyrysynda Almaty qalasynda qol qoıylǵan bolatyn.
Kelisimniń negizgi maqsaty - Eýrazııalyq ekonomıkalyq odaqta taýarlardyń zańdy aınalymyn, tutynýshylardyń quqyqtaryn qorǵaýdy jáne olardy jańylystyratyn áreketterdiń aldyn alýdy qamtamasyz etý úshin taýarlardy sáıkestendirý quraldarymen tańbalaý salasynda kelisilgen, úılestirilgen saıasat júrgizý.
Qujat tańbalanatyn taýarlardyń aınalymyna baqylaýdy júzege asyrý jolymen kóleńkeli ekonomıkanyń kólemin qysqartýǵa jáne bıýdjetke salyq túsimderin ulǵaıtýǵa baǵyttalǵan.
Otyrys barysynda senatorlar tańbalaý sharalary aıasyndaǵy qosymsha shyǵyndar taýar baǵasyna qanshalyqty áser etetinin surady.
«Bul máselede barlyq múddeli memlekettik organdarmen tıisti tujyrymdamany pysyqtadyq. Birinshiden, áleýmettik mańyzdaǵy taýarlar, onyń ishinde dári-dármektiń keıbir túrleri tańbalanady. Osy oraıda onyń quny (tańbalaý quny) ónimniń sońǵy baǵasyna áser etpeıdi. Bul turǵyda shyǵystar operatorǵa júkteledi. ıAǵnı, bizde birneshe qadamdar eskerilgen», - dep toqtaldy QR Qarjy vıtse-mınıstri Rýslan Eńsebaev Parlament Senatynyń Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda.
Onyń sózine qaraǵanda, dári-dármek óndirýshilerdiń kóbisinde tańbalaýǵa qajetti jabdyqtar bar. Bul rette qosymsha qarjy shyǵyny bolmaıdy. Sáıkesinshe, tańbalaý sharalary atalǵan óndirýshiler taýarlary qunyna áser etpeıdi.
Budan buryn habarlanǵandaı, atalǵan zań jobasy talqylaý kezinde Parlament Májilisiniń tóraǵasy Nurlan Nyǵmatýlın taýarlardy tańbalaýdy engizý barysynda ónim baǵasynyń ósimine jol bermeý kerektigin aıtqan bolatyn.
